FA'ALUPEGA

Afio mai lau afioga Ulualofaigā na fa’aopega ese i Ātua le fauono

Afio mai le ta’auso (Mataitulialii, Amatafafai ma Timuia-i-alatogo)

Afio mai lau afioga Satiu

Afio mai alo o Sina (Fonoti ma Leilua, Faumuina ma Muagututi’a)

Maliu mai oulua Togia’i ma Fa’asilisau

Maliu mai Ātua a le fauono

 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

O LE GAFA O ULUALOFAIGA

Painu’ulasi (f) ma Ualegalu (f)

Na usu mai Tuitoga Faisautele i le tama’ita’i o Painu’ulasi fa’ae’e le gafa o:

  1. Ulualofaiga
  2. Vaetoeifaga (f)

Ulualofaiga na usu i le tama’ita’i mai le afio’aga o Lotofaga fa’ae’e le gafa ‘o le tama o:

  1. Ulualofaiga Una

Ulualofaiga Una na usu i le afafine o Mataituli fa’ae’e le gafa o:

  1. Ulualofaiga Mataituli
  2. Timu’iaialatonu
  3. Soifualupe (f)
  4. Amatafafai

Ulualofaiga Mataituli na usu i le afafine o Polamalu i le afio’aga o Ma’asina fa’ae’e le gafa o:

  1. Ulualofaiga Lema’ave’ave

Ulualofaiga Lema’ave’ave na usu i le tama’ita’i o Salaina’aloa (f) fa’ae’e le gafa o:

  1. Ulualofaiga Leoitiiti
  2. Fa’aluaomeke (f)

Ulualofaiga Leoitiiti na usu i le tama’ita’i o Samala’ulu fa’ae’e le gafa o:

  1. Ulualofaiga Farao

O le ali’i lenei o Ulualofaiga Farao na ea ai le pologa o Fagaloa i lana tautua i le maota i Mulinu’u.

Ulualofaiga Farao na usu i le tama’ita’i o Tulimalefo’i fa’ae’e le gafa o:

  1. Ulualofaiga Mauga Lei
  2. Ausai

Na toe usu Ulualofaiga Farao i le tama’ita’i o Fa’alogoifo fa’ae’e le gafa o:

  1. Ausai
  2. Fa’ausu
  3. Saisului (f)

Na toe usu fo’i i le afafine o Utuga fa’ae’e le gafa o:

  1. Solo

Na toe usu fo’i Ulualofaiga Farao i le tama’ita’i o Enite fa’ae’e le gafa o:

  1. Ulualofaiga Emelio
  2. Fu’eumu
  3. Iulio

 

Ulualofaiga Mauga Lei na usu i le tama’ita’i o Tofoipupu le afafine o Tuitele i Leone fa’ae’e le gafa o:

  1. Aitogi (f)
  2. Falesau (f)
  3. Selina (f)
  4. Tuitele Magauli