‘Ua fausiaina lenei Maota Tapua‘i Bahá’í mo tapua‘iga sa‘oloto moni i le Atua a so‘o se itū’āiga o tagata, lanu, gagana ma talitonuga uma lava. O le mafua‘aga lea o le faitauina o so‘o se Tusituisiga Pa‘ia mai Tapua‘iga ‘ese‘ese i sauniga uma e faia i lenei Maota Tapua‘i, ae lē mafai ona faitauina ai ni tusitusiga mai so‘o se tagata.  O nei fo‘i sauniga e tu‘u sa‘o lava e aunoa ma ni fa‘atinoga e pei ona masani ai isi Tapua‘iga. E leai ni faifeau po o ne failauga fa‘au‘uina i le Fa‘atuatuaga Bahá’í. O le Maota Tapua‘i e tatalaina mo tagata uma e faia ai a latou talosaga ma manatunatuga loloto i le Atua.

E lē aoina ni tupe. Ae ‘ua na‘o tagata talitonu Bahá’í lava e fa‘atagaina e foa‘i mo fa‘aputuga tupe a le Fa‘atuatuaga. I le talitonuga fa‘a Bahá’í o se fa‘aeaea ma se fa‘amanuiaga fa‘apitoa fa‘aleagaga lava lea. O foa‘i uma fo‘i e faia fa‘alilolilo ‘atoa ma le loto malie.

O le Maota Tapua‘i Bahá’í i Samoa sa fa‘apaiaina i le tausaga 1984. E iva faitoto‘a e ulufale ai i totonu, ma o le fa‘ailoga lea o le aufa‘atasiga o tagata soifua uma i so‘o se lanu, tapua‘iga, atunu‘u ma itua‘iga uma lava. O nofoa i le ogātotonu o le Maota, o lo o alo tonu i Laufanua Pa‘ia. O le vāega i luga i le ogātotonugalēmū o le fa‘aofuofu, o lo o tūsia ai le fa‘ailoga o le Suafa Aupito Silisili‘ese. O vi‘ivi‘iga ia i le Atua i le gagana fa‘a-Arapi, ma ua fa‘aliliuina fa‘apenei: “O Lau Afio, o le Mamalu o Mamalu Uma Lava.”