O ona pō ia ‘a ’o tū ai le mālō iā Lei'ātaua Lelologa i Manono, ‘a ’o fa'asavali le malaga a lenei ali'i toa lauiloa iinā ona pō ‘o Sāmoa i le motu o Salāfai, na afe ai lo latou va'a i Vaoto ina ua fia maua se vai ‘e inu. Ona alu a’e lea i uta le atali'i o Lei'ātaua ‘e utu vai, ina ua uma ona utu palevai, ona pese ‘e'ē ai lea i le vai ma ‘avea lana pese ma fa'asoesā i le nu'u, ma ua latou laga mai loa ma fasi le tama.

Ua iloa mai lea ‘e i latou sa i le va'a, ona latou laga mai lea i uta ma ua tau loa le taua ma le nu'u o Vaoto. Ua o'o ai ina tulia ‘au a Vaoto, ae mālō Lei'ātaua ma lana ‘aumalaga. Sa iloga le mata'alia o le tama lenei ma ‘o lona igoa o Fogatia, ma ‘ua fiafia ai lava le finagalo ‘o lona tamā o Lei'ātaua. Ona fa'apea atu lea o Lei'ātaua, “se fa'afetai ua iloga lou tū malosi i puapuagā o Lei'ātaua, ‘ae sau o le ‘a tu'u lou igoa ‘o Fogatia ‘ae ‘o le ‘a ‘e igoa iā Tuipuapuagā ‘o Lei'ātaua ma ‘o le ‘ā ‘e nofo iinei i Vaoto ‘e pine fa'amau ai lo tatou manumālō ‘ae o le ‘a ‘ou fo’i i Manono. A i ai ni aso ‘e ōmai ai la'u fanau iā te oe, ‘ia ‘e alofa i ai auā ‘e tua vale Manono. Na usu ai lea ‘o le tama lenei, ua fa'apu'upu'u lona igoa iā Puagā, ua usu iā Sinasauali'i le afafine o Tuisafua, ona maua ai lea ‘o le fanau ‘e to'atolu, e to'alua tama ma le teine. 

O le tama matua na fa'aigoa iā Pese, ‘e fa’amanatu ai le pese ‘a le tama lea na mafua ai le taua.

O le tama lona lua na fa'aigoa iā Tauvaotomamanono ‘e fa'amanatu ai lea taua i le vatau ai o Vaoto ma Manono

O le teine na fa'aigoa iā Vaitanu e fa'amanatu ai le tanuga o le vai lea ‘e le tama lava lenei o Puagā.