O LE ALA I LE FA'AOLATAGA

O LE VI'I O PETESA UTA

Si o’u nu’u e, ‘e tū lata i le vaomatua

E lē ‘o se nu’u po ‘o se ‘a’ai mai anamua

Na ‘ou tu 'i le soata ma gaosia le vaomatua

Ua fai nei ma tafa o Kanana Fou le laumua

 

E te fiu ‘e sa’ili Petesa i le fa’afanua

O se tu’uga ‘auro sa nātia pei se tupua

‘Ae ‘ā ‘e maua, alii e, ‘ua ‘e laki

Ua mautinoa lou ala tu’u sa’o i le lagi

 

E fa’atauva’a Petesa i lau silasila

E lē maua ita i fa’alupega o Tutuila

‘Ae ‘oute ta’u atu, ‘e leai se fa’aletonu

Auā o le nu’u, na fa’avae i luga o le lotu

 

O teine ma tama Petesa omai ia

Se ‘i fa’afiafia le mamalu o le aofia

Teuteu lau siva, ma fai ia matagofie

O le ti’a ‘e mālie, na ‘ona fīfīmālie

 

“Oi Petesa e, o lo’u igoa 

Oute mimita iā Samoa

A galo oe ia gase lo’u lima

Ma pipi’i a’e lo’u nei laulaufaiva”

 

Tusia e: Fofō I. F Sunia

OSANA

IA MANUIA LĒ ‘E MALIU MAI I LE SUAFA O LE ALI’I, O LE TUPU O ISARAELU.

Ioane 12: 13

OSANA, ‘IA MANUIA LĒ ‘E AFIO MAI I LE SUAFA O LE ALI’I

IA MANUIA LE MĀLŌ UA O’O MAI ‘O LO TATOU TAMĀ O TAVITA

OSANA I MEA AUPITO A LUGA

O le lauga i le suafa mamalu o le Atua o le Tamā, le Alo ma le Agaga Pa’ia

Amene

Ua fa’alelei e Keriso loto ‘ua momomo

O le ‘autū lenā

Samoa ‘o le atunu’u talimālō

A o’o ‘ina to’ai tupu o le atunu’u, o tamāli’i

Tapena a le aso o le feiloa’iga. E tapena le alofisā, ‘e pati le ‘ava, se ‘i feiloa’i tupu ma tamāli’i.

A!

Se fa’atinoga iinā maualuga

Se fa’aeaea iinā mamalu

O le mea lea ‘e tulaga ‘ese ai lava Sāmoa ma lana aganu’u. 

E iai taimi na afea ai le atunu’u, i se tasi o malaga mamalu mai le Iunaite Setete i Uasinitone (Washington). O le a le mea na tupu? Ua fili launiu pou ‘o le ‘auala tele, ‘ua tapena tafā ala, fanau ā’oga ‘ua fa’aituala lua ma talotalo. O le a lava le mafua’aga ‘o le afea o le atunu’u?

Fa’aalia lava le agaga fa’afeiloa’i. O le agaga ‘o lo ‘o fa’ailoa atu ai ‘ua matou talia ma le agaga fa’afetai lo ‘outou afifio mai.

A o’o fo’i la ina toe taliu le malaga, ‘e foa’iina ‘e le atunu’u measina, e fai meaalofa ai i mālō mamalu na afe mai.

Ma’umau e, pe ana toe mafai ona liliu le taimi.

Ma’umau e, pe ana o Sāmoa lea ‘e fou ai le malaga o le tala o le aso lenei.

O le tala na tatou faitauina.

Ina ‘ua maua le tala i le Ali’i, ‘o le ‘a afio mai i Ierusalema. E le ‘i toe nofonofo le motu o tagata. E lolofi ane se ‘i fa’afeiloa’i le faigāmalaga lea. Ua fa’aitūala lua ai fo’i i le ‘auala ma talotalo. Se ‘i tatou va’ava’ai a, ‘i le fa’afeiloa’iga o le malaga, pei o Samoa ma ana measina, mea taua e fa’atali ai mālō, fa’apea Isaraelu.

E leai la, ‘e le ‘o siapo la ma launiu ‘ua fili a'i pou, ‘ae fai mai, o lau o le la’au o le PAMA.

O le telē ia o le tāua iā Isaraelu le la’au o le pama ma lau. E le ‘i tu’umāmāina fo’i e Isaraelu le fa’ataliga o le malaga lea ‘ua fou mai.

E taofi Isaraelu. E iai fa’ailoga tāua ‘o lo ‘o ‘aumaia ‘e le la’au o le pama, ‘a ‘o ni ‘autū fa’a-le-Tusi Pa’ia fo’i, ‘e talafeagai ma le faigāmalaga lea ‘ua sau.

O ā ia fa’ailoga?

 

Muamua

O LE MANUMĀLŌ

Fa’ailoga o le manumālō

I tū ma aga a le Atu Iutaia i Sasa’e anamua. O lau o le pama, ‘o le fa’ailoga lea o le manumālō. O le ala lea o le fa’aaogāina i le malaga a Iesu, ‘auā o le malaga ‘ua ta’ua o le “Ulufale manumālō i Ierusalema”. 

Fai mai lea o le vaega o le matua na faitauina.

Osana, ia manuia lē ‘e afio mai i le suafa o le Ali’i, o le tupu o Isaraelu.

Fa’aaogāina o le lau o le pama, ma ‘alalaga: “Osana”.

E fa’ailoa pe fa’aeaea ai iā Iesu, o le tupu manumālō, o le Mesia na valo’ia.

Na ō a la ma le mautinoa le motu o tagata ia ma ē na tutū i le ‘auala.

Na ō lava ma le mautinoa ma lau o le pama. O le manumālō lea ua iai i le ala. E latou te fa’atalitali ‘i ai, ‘e tusa ma le latou taofi.

 

Fa’ailoga lona lua ‘o lo ‘o ‘aumaia ‘e le pama ma lau o le pama

O LE AMIOTONU MA LE TUPU LAUOLAOLA

Fai mai le fa’amatalaga a le Fai-Salamo 92: 12

E tupu lauolaola le tagata amiotonu ‘e pei o le pama, ‘e tupu tele e pei o le arasi i Lepanona.

O le vaega lenā.

Aumaia ‘e lea manatu ‘o le la’au o le pama, ‘e iloa lona malosi. ‘A o’o ina sosolo ona a’a, ‘e alu a ‘e tau i lalō. Fai mai ‘a tau atu i le papa, ‘ona sa’ili lea ‘o le vaipanoa ‘o iai le ‘ele’ele. O le a lona uiga? E sa’ili se ‘i mautū ma malosi ai le tū o le pama, ‘e lē maluelue.

Ua fa’atusaina fa’apenā le tagata amiotonu. O ā faigatā e fa’asalāvei mai, ‘e sosolo lava le amiotonu, ‘e sa’ili le mea ‘e mautū ai le fa’amoemoe. E pei o ‘upu ‘autū o le fa’amoemoe a le atunu’u: “E tāmau a le fa’amoemoe iā Keriso Iesu, ‘e mausalī ai lona ala.”

O ai la lea tagata amiotonu?

Le tama lea ua i le ala. Lele ‘ua aga’i atu i Ierusalema. Ua fa’afeiloa’i ma taaloalo ai lau o le pama ma latou ‘alalaga: “Osana”.

O le tama ‘e tau tupu lona gafa.

‘A ‘o le amiotonu a le Atua, ‘e leai se mea ‘e gata mai ai le malosi ‘o lona mālō.

 

Fa’ailoga lona tolu

O LE FILEMŪ MA LE MĀLŌLŌGA

O le tala i le faiga o le “Fale o le Atua” ‘e Solomona. O lo ‘o fa’amauina i le Tupu 1: 6:26

Fai mai o pā o le malumalu o le Atua, o lenā e mamanu ai le la’au o le pama, ‘o lo ‘o ta ai le ata o le lau o le pama. O le a lona uiga?

Fai mai o le fa’ailoga lenā ‘e fa’ailoa mai ai. O ē uma ‘e ulu atu i totonu o le malumalu o le Atua, ‘ia lagona le filemū o le Atua. Ia lagona le mālōlō lelei o le mafaufau. E ulu mai, fa’afeiloa’i le filemū o le Atua, se ‘i to’afimalie ai, ‘auā ‘ua lailoa i le vaiaso ma ona gasologa.

O le “Fale o le Atua” ‘o iai le filemū, ‘e mapu ma to’a ‘i ai ona tagata. E ese le manaia o lenei fa’ailoga. E le gata i totonu o le “Fale o le Atua”, ‘a ‘o ona pā.

O le tāua lea o lenei maota.

O le filemū o le Atua e tumau, ma e tatau, ‘e tatau lava ‘ona lagona ‘e ona tagata i totonu ‘o ona “Fale Tapua’i”, ma le tele o isi fa’ailoga o le la’au o le pama ‘ua fa’aaogaina ‘e Isaraelu.

Fa’ailoga ‘ua talatalaina mai ai le taua o lenei la’au i lo latou taofi. E le ‘i lilo la ia mea tāua iā Iutaia. ‘Ae pagā lea, ‘e ‘ese le mea lae mafaufau ‘i ai Iutaia.

Po ‘o ‘ua leva na fa’atalitali Iutaia le Mesia ‘e valo’ia

O le Mesia e sau i ao o le lagi

E sau ma ‘au ‘o le lagi

O lo ‘o manatu Iutaia, se Mesia, na ‘ona si’i lava ‘o le lima, tulolo ‘uma faigatā. Na ‘ona si’i a o le lima, to’ulu fa’amanuiaga.

Iā Iutaia, ‘o le Mesia lenā, lea latou te fa’atali ‘i ai. Peita’i, e lē ‘i fa’apeaina.

Na fa’aalia fo’i i le latou ‘alaga ma le fa’aaogāina o le ‘upu “Osana”. 

O mea ‘o lo ‘o ta’ele i le loto o le Iutaia. O le ala lea o le latou manatu i se Mesia ‘e iai le mana.

Na latou ‘alalaga ai “Osana, Osana, ‘ia manuia le ‘e afio mai i le suafa o le Ali’i”.

O le a lona uiga?

Le Ali’i, fa’aola mai ‘i matou.

Le Ali’i, fa’amolemole, fa’aola mai ‘i matou.

O le uiga o le “osana” i le loloto o le latou vala’au. Ua uma lo matou malosi.

Ua leai se isi fa’amoemoe, toe ‘o le suafa o le Ali’i, fa’aola mai i matou. O le mea lenā la e ta’ele i le loto. Na latou ‘alalaga ai, le motu o tagata ‘ua lailoa.

Manaia fa’anaunauga o le loto, peita’i o le mafaufauga, talofa ‘ua maoaluma ai so latou fa’amoemoe. Ua lē ō gatasi ai le futia ma le umele o le latou taofi. E sau le Mesia, ‘e fa’aleatua ona lagona.

E galue le Atua i ona ala, e fai vaega le Atua i ona ala, mo le to’afimalie, ‘ae ‘ua ‘uma ona a’oa’o mai e le Ali’i, pei ona feagai ai ma ona so’o.

O le ala o le manumālō. O le ala taua lena o le fa’ailoga o le pama na ala ai ona toe ‘aumai. 

Ua a’oa’o mai o le ala o le manumālō, fai le amiotonu.

Ua a’oa’o mai o le ala o le manumālō, sa’ili le filemu. Ia ō i le Mauga o le Atua. Ia ō i le “Fale o le Atua”.

Maua le to’afimalie, tupu lagona e fou. 

O le ala o le manumālō, ‘ua a’oa’o mai e Keriso mo ‘i tatou, ‘ia tatou fai le amiotonu ma le fa’amaoni.

Taofi lena le ‘auuso e, ‘o se lagona fo’i lea ‘e tatou te toe tōmanatu ai. O le ‘upu Osana ua tatou pepese ma tatou ‘alalaga atu ai. 

Ia tatou fa’apea atu lava, ‘ua leai so tatou malosi. Se ‘i vaganā se tagata ‘e punou ma ‘a’apa mai, si’i a’e tatou i lo tatou to’ilalo. O ai la lea tagata?

Ua na’o Iesu lava. O le Ali’i na afio atu i Ierusalema. O le Atua pule aoao, ‘e ‘aumaia le ola fou mo ona tagata. A liliu mai la i le tulaga o le tatou soifuaga ma le ola.

Le ‘auuso e,

E mana’omia ona tatou ‘alalaga pea: “Osana”.

O fa’afitauli ‘ua tula’i iinei ona pō, nei vaitau ‘ua lamatia ai le soifua. Ua matuā lē mataofia a, le ‘ava ‘o’ona, le fuala’au fa’asāina, le mariuana, le ‘aisa, matuā le ma taofia a.

Ua amata ona sola le amiotonu, ‘ua lē fa’atinoina i totonu o Fa’alapotopotoga, le Atunu’u, Itūmālō, Faigamālō, e o’o lava fo’i i Ekalesia.

O ona tagata galulue, tausia o ‘Āiga, faiga o le mālō, e o’o lava fo’i i le Ekalesia, tulou lava le gutu ma le afi, ua tau maluelue fo’i le fa’amaoni. 

Le Atunu’u, le Faigamālō, ‘aemaise le Ekalesia, e fau e tagata Kerisiano, e galulue ai tagata Kerisiano. O le fe’au o le laupama, toe silasila i fa’ailoga o le laupama.

E lē ‘o se vavega e sau mai le lagi, ‘ina ‘ia tineia ai, ‘ua a’oa’o mai le Agaga o le Atua iā te ‘i tatou, ‘aumaia ‘e le Atua le meaalofa o le poto ma le mafaufau, ia fai le amiotonu.

A iloa le mea sesē e tatau ona tu’u, tu’u.

Tatou fa’asaga i le Atua.

Manatua, le ‘auuso e, ‘aua ne ‘i pei tatou o Iutaia ma le latou fa’amoemoe. 

Taofi i se Mesia e sau ma se peluafi

E galue mai lava le Agaga o le Atua i ona ala, e fai vavega iā te ‘oe ma a’u. Ua a’oa’oina i le mana o le Agaga o le Atua.

O tatou lava e fofōina le fa’afitauli, le Ekalesia, ‘auā ‘ua iā te ‘oe le Agaga o le Atua, ‘ua iā te a’u le Agaga o le Atua.

Ae ‘ā iai lava le tagata ‘e fa’atauaso pea ona manatu, ‘e fa’ataute’e pea i le finagalo o le Atua. Sa’ili le Tusi Pa’ia. E le tu’umāmāina fo’i ‘e le Agaga o le Atua.

Tau a ina fa’amanatu i lenei Aso Sā o le Laupama, le ‘auuso e, o le vaiaso pa’ia lenei ‘ua tatou savalia. E galue mai le Atua e ala iā te oe ma a’u ma lona Agaga ‘ua iā te ‘i tatou, ‘e tineia ai fa’afitauli ‘uma.

Tatou sāvavali ma le Ali’i i loto ma agaga, i lenei vaiaso pa’ia.

‘A ‘o aga atu fo’i le Atunu’u mo lou aso fa’amoemoeina, manaia lou manulauti.

TĀMAU I LE FA’AMOEMOE

O le fesili, o le ā le fa’amoemoe?

Fo’i i le Ali’i. Tāmau i le Ali’i ma lona finagalo, e manuia ai lau fa’atautaiga. 

Agalelei le Atua. Ia iai lona filemū iā te oe le Atunu’u pele, Faigamālō ma ona tagata, ‘aemaise ‘oe le Ekalesia ma lou tiute, ‘ia agalelei le Atua.

Ia manatu i fa’ailoga o le laupama, ‘e fesoasoani mai lava le Ali’i, tatou te manumālō ai.

Lele ‘ua aga atu i le satauro, fa’ailoga lea ‘e tatou te va’ava’ai ai i le pule aoao o le Atua ‘ua tu’uina mai ‘e fa’ato’ilaloina ai le tu’ugamau ma le oti, toetū manumālō, ‘iinā ‘aumaia iā te ‘i tatou, le filemū ma le mālōlōga

AMENE

 

LAUGAINA LE 'UPU

Rev. Tusi Seanoa Ve'a Jr

Pulega Tafa o Kanana Fou

April 14, 2025