FA'ALUPEGA
Afio mai le tama ‘āiga o lau afioga i le Matā’afa
Susū mai le matua, o Tauiliili
Susū mai le usoalii
Afifio mai alo tutusa o le Matā’afa (Tupuola, Fonoti ma Fa’asuamaleaui)
Afifio mai tama a pa’a (Ilimaleota, Tuimaseve ma Luamanuvae)
Alaala mai oe le aualuma a Fonoti
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE ITŪMĀLŌ O ALEIPATA
Afio maia, afio mai Fagasoaia
O le sa’oaualuma
O ia lava ua tofia, i le faiva o mānaia
Lafo i Aleipata, o le nu’u matagofie
O le suli o le tupu lenā ua filifilia
Malelega o le Tuiatua iā Fagasoaia
O ia lava ua tofia,tofia e le Tuiatua
E su’ea se siapo, mo Fuataga ma Tafua
Ua ou sau nei, se’i ta tou aleaga
I si o’u nu’u moni o Aleipata
I le ta’aloga, o le fa’aagatama
Ma le talutalu fou, o aso ia o le malamalama
O Fepulea’i, ua e’e ai pāpā
O le ‘a feagai ma Tumua
A’o Fagasoaia, o le sa’oaualuma
O ia lenā, o le ‘a maua ai mea uma
VI'IVI'IGA O LE AFIO'AGA O AMAILE
Faatulou atu i lau susuga, a Tauiliili o le matua
Usoalii ma tama pa’a, alo tutusa o le Matā’afa
Ae tainane fo’i upu iā Fonoti ma le aualuma
Pāfuti o le sa’otama’ita’i lenā
O ou pa’ia na ua nu’unu’u atu
Oute tiu ai i Samoa
Sa tauasa mai e tua’ā, ua lagomau mai i ti’asā
Sa lē faigofie, le foafoaina o mea uma
E pei o le atiina o le pa o Ierusalema
E la’u Amaile
Amaile ma le Anapapa
O lo’u mitamitaga oe
E tumau i lo’u agaga
So ‘o se mea lava oute alu iai
Oute manatua pea lava
Lo’u nu’u sa ou fanau ai i Aleipata
O ou laufanua e lanulau’ava
E si’omia e le samitioata
Galueaina le tamā’o’aiga, faapea au mea taumafa
Leai o se mea e te popole ai, o lo ‘o punapuna pea o le vai
I lou galala mai i galuega sa ‘e feagai ai
E manaia atufālega, e manaia fo’i o le ta’elega
E mālū o le vai o le tama, e fa’amālū ai le vevela
A ‘e ta’ele ai, pei ua e tofu i le vai o Petesa
E te fa’amalosi ai pe ‘a e vaivai i galuega
Ta o le ono, ili loa o le sā, ulufale uma ‘āiga
E fa’afo’i o le vi’iga, ma le fa’afetai i le Atua
Auā e tasi lava le Ekalesia o le Katoliko Roma lea
O le ala lenā o le mamalu o pulega
Le malumalu Samoa, tapua’iga i le suafa o le Atua
E a’oa’o ai tupulaga, i le ola fa’aleagaga
A’o le maota gasegase mo ē ‘e mama’i ma mafatia
Le auauna a le Atua mo le upu folafolaina
EKALESIA KATOLIKO I AMAILE (ALEIPATA)
SAGATO MIKAELE
TA FIA PA'I I LE VAI O LE TAMA
“TA FIA PA’I I LE VAI O LE TAMA”
Sa lalama Tagaloalagi ma lona to’alua i se tasi pō, na amata i gatai o le nu’u o Ti’avea ma fa’asolo atu ai i le talafatai i sasa’e. O ia aso o feagai le faletua ma le maitaga tau fafine. Na fa’afuase’i ona faa-tigā le fafine ma ua fanau i luga o le papa. Sa le mamafa i ai le finagalo o Tagaloaalagi auā na ‘o se alualutoto, ona tu’u lea i luga o le papa ‘a ‘ua fo’i i le pō.
Ua ao, ua fa’aifo ane manulele o le tuasivi aga’i i le tai mo sa’iliga o ni mafua o le taeao o lo ‘o tamosi i le fogatai.
Ua ‘apelepelea luga a’e tonu o le ‘alu’alutoto i gogo o lo ‘o tau fai tagi. O ni isi manu sa fa’apau’ū ifo ma tu’utogi i le ‘afu’afu o lo ‘o ta’atia.
Mulimuli ane, ua gaoioi le pepe ma ua maina a’e le leo ‘iīvale o le pepe meamea. O se tasi mau o le tama lea sa tausia e ni Isi ilamutu o Tagaloaalagi ma sa ola a’e ai i lea ogavao i le talafatai.
O aitu po ‘o ilamutu fo’i nei na latou ulua’i fa’aigoa le tama lenei iā “Tu’u togiagogo”.
O le ola a’e o le tama ua lē ‘ese fo’i ma se uiga fa’asaualii e pei ona faamatalaina lona fa’afailelega. O se aso fo’i e usu seu se faiva o le tama aga’i i Sasa’e, ‘a o’o fo’i i le pō ua alu se lamaga. Ona ite lea o Tagaloaalagi ‘e lē taumate o le alualutoto na lafoa’i lea ua tupu a’e ai le tama nei.
“Po ‘o fea na tū i ai faiva o le tama?”
O le gataifale o le nu’u o Amaile ma Samusu sa matua i ai le tu’u, ma ua masani ai i lea aso ma lea aso. O le tama, sa le ‘i fiafia e feiloa’i i ni tagata, o le ala lea sa ‘alo’alo ai ma fealofa’i i va’ai i le fegāsoloa’i o tagata. I gātai tonu o le nu’u o Amaile e i ai se ana ‘o puna mai ai le vai. Sa fale i ai le alii lenei ae sa le iloa e tagata o le nu’u ma sa latou le iloa fo’i se punāvai.
Sa ‘a’auina ‘e Tagaloaalagi lana masaga teine e saili le tama ina ia latou malaga ane i le lagituaiva. O Ila ma Tualalafa po ‘o Tualafalafa fo’i le ta’u a ni isi, o igoa ia o teine. E lē matea na matuā fa’atapito ona saili solo i le gataifale se’ia o’o lava i gātai o Amaile. Na segia mauli ma tete’i tama’ita’i ina ua la va’aia se alii o lo ‘o tā’ele’ele i totonu o le ana, o le puna lea.
“E leai la se isi o le tama la lea, o le atalii lava o lo ta tamā”, o manatu ia o teine.
Sa taumafai teine e taofi le tama se’i o latou tautala. Ae peita’i ‘e le gata ina musu ‘ae le fia feiloai fo’i i tama’ita’i. E a Ila ma Tualalafa e tau taofi le alii ae a Tuutogiagogo e tatā ese ona lima ma ia mamulu ese ‘ae alu.
Ua ‘avea le vavao ma tapisa o mumūfaloga na logo a’e ai i’uleo i tagata o le ‘a’ai ma ua alu ifo le tuli se’i va’ai pe se a o lo ‘o pisao nei. E lē tatali e tama’ita’i le malosi o le tama ua vaivai fo’i Ila ma Tualalafa, auā ua leva ona faataugagase le tauiviga. O le vaivai o le masaga pei ona tā’ua, ua fai ma faitoto’a na segia ‘ese ai o la ola ua liuma’a uma i la’ua i totonu o le ana, o le punāvai lava lea.
“Vai o le tama, mafua i se ā?’
Na feauga le lolofi ane o tagata, ae va’aia loa le tama ua savali aga’i i le mulivai o lo ’o tafe atu i le sami. Sa fonō ni isi o le nu’u i le tama ina ia fa’atali ma liliu ane mo i latou, peita’i e lē gagana le alii ‘a ‘ua savali pea aga’i i le talafatai i Sisifo ma mou malie atu lona tino. Sa va’aia e tagata le vai auā latou te le’i iloa anamua ‘atoa ma ma’a tetele e lua ua tūtūlala’i ai i totonu o le vai. E tasi le upu ua musuvā ai tagata o le nu’u a’o ai le igoa o le tama, o le tali ma le gagana “se o le tama lale ua alu atu”. O upu ia ma le lagona maofa o le nu’u.
Amata i na aso, ua ta’u lava le vai lenei “O le vai o le tama”, le alii o Tuutogiagogo. O le molimau a le afio’aga o Amaile o ma’a tetele e lua sa i totonu o le ana o le punāvai ua fa’aleagaina i le malosi o galu fafati i taimi o afā ma peau. O Ila ma Tualafalafa na sa liuma’a ai e tusa ma le taofi. O se vai mālū ma le manino, e fa’aaogā fo’i mo vai taumafa, ae ‘o se taelega logo i tino lona mālū pe a ta’ele pe ‘au’au ai fo’i. O le mafuaaga fo’i la lea o le upu – “Ta fia pa’i i vai o le tama”, ona e tupu ai le malosi fa’afouina pe afai e ta’ele ai.
Anamua, sa pumo’omo’o ma vaiti le vai, ae talu ai o galu malolosi ua faaleagaina ai, ‘ātoa ma le lautele pei ona ua i ai nei.
“O LE VAI O LE TAMA O TU’UTOGIAGOGO I LE NU’U O AMAILE