O le lauga i le suafa  mamalu o le Atua o le Tamā, le Alo, ma le Agaga Pa’ia

Amene

Ua maua le matua o le lauga i le tusi lea na tatou faitauina.

Failauga i lona matā’upu e 3. E fia fa’aaogāina le fuai’upu ‘e 6 ma le 7. Oute toe faitauina.

 

O onapō ‘e sa’ili ai, ma onapō ‘e tu’u ai ‘ua leiloa. O onapō e tausi ai, ma onapō ‘e lafoa’i ai. O onapō e saei ai ma onapō e su’i ai. O onapō ‘e fa’alologo ai ma onapō e tautala ai.

 

O le manatu ‘autū o le lauga e tusa ai ma le fa’asinoga o le tusi faitau aso o le EFKAS e fa’apea:

 

Ua pisi tele, ‘ua lē galue ai. Ua pisi tele ua lē malōlō ai.

 

Ua si’omia i tatou i se lalolagi, ‘e foliga mai e fua le tāua o le tagata i le tele o ana galuega. E peiseai ‘ua mamanuina lona si’osi’omaga, ‘ina ‘ia fa’atumu so ‘o se minute 'o le olaga o le tagata. Ua atagia i taumafaiga uma 'a le tagata, le taumafai e fa’atumuina lona taimi, e ala i le tuliloa o le tamā’o’aiga, galuega, ma mauaina fiafiaga ‘e lē gata. O le tagata ‘ua lē manofonofo, ua lē mapu, ua lē tū ma malōlō, ua leai se taimi e mafaufau ai ma le toto’a, ua leai se poto e filifili ai i mea sili ona tāua, ‘ae 'ua 'avea ma pologa o le pisi.

O lenei itū’āiga pisi, e fati gatā. Aiseā?  E alu ai le malosi, ‘ae leai se fua tumau o le galuega, ‘auā ua leai se avanoa, ua leai se vaipanoa mo le fatufatua’i, po ‘o le faia o galuega, ia iai se uiga loloto o le soifuaga, e foliga fa’apea le ata, o le soifuaga o le tupu o Solomona. O le tagata na ole i le Atua i le poto, e fa’amasino ai lona nu’u. 

 

E le gata la na foa’i ai e le Atua le poto, na foa’i ai le loto matala, foa’i ai le tamā’o’aiga e tele, talu ai sa iā te ia le tamā’o’aiga, sa ia te ia le pule, e le gata ‘o ia o le tupu, sa ia taumafai e fa’amālōlō le gaogao o le olaga, e ala i le fa’alauiloa o galuega tetele e fausiaina ma fa’atumuina itūlā o lana savaliga e ala i galuega, peita’i, na va’aia e Solomona le taunu’uga o le ‘ese mai le poto o le Atua, ma sasa’a atu lona malosi i mea fa’alelalolagi e lē tumau. O le ‘auga lea.

O le ‘auga lea o lona tusia o lona tusi o le Failauga, ‘ina ‘ua toea’ina ma matua lona soifua. Ina ‘ua uma ona ia tofo i le tamā’oaiga, ua tofo i le malosi, ua tofo i le fiafia uma o le lalolagi, na ia iloa ai, o le galuega mamafa. O le galuega mamafa le pisi, le pisi fua ‘e aunoa ma se fa’amoemoe i le Atua. Fa’amoemoe i le malosi, fa’amoemoe i le atamai, fai mai Solomona, o le mea noa, ma le fa’anoanoaga sili lea, ua ia toe tepa, va’ava’ai i tua ma iloilo le olaga i lalo o le lā, ma fa’apea ai ana ‘upu, e matuā fa’atauva’a, e fa’atauva’a mea uma lava. O le soifuaga o le tupu o Solomona. Na ia fausia maota tetele, na ia faia le malumalu tele mo le Ali’i, ma pulea se mālō tele, na ia sa’ili mea uma e fiafia i ai. Na ia fa’aputuina le ‘oa ‘e ‘aunoa ma se malologa e tasi. Ua ia toe tepa i tua i lona olaga, le olaga pisi, ma ia tā’ua ai, o mea uma e leai se aogā, ‘o le ‘ai o le matagi. 

 

Ua ‘avea le pisi ma mafua’aga o le gaogao fa’aleagaga. Aiseā? Auā o lo ‘o talanoa e pei ona tatou faitauina i lenei aso. O le tāua o le taimi? Fai mai o le tausaga i mea uma ma onapō i mea uma. O le aso ma le mea e tupu ai. O le manatu o le poto, ua ‘avea le pisi ma auala ua fāoa ai le filemū, ‘a ‘o se fa’ailoga o le lē fa’atuatua o le tagata, ua si’i le tā i le Atua, ‘auā fo’i o le taimi e pule ai le Atua. Ua fa’atulaga e le Atua vaitau e talafeagai mo galuega uma a le tagata. O le pule aoao o le Atua ma ana fuafuaga e iai taimi mo mea uma. ‘A ‘o le paleni lea o le soifuaga, i le silasila a le Atua, o le paleni lea o le soifuaga mo le tagata ola. Ua ia tu’ufa’afeagai mea uma o le soifuaga, o le taimi e fanau mai ai ma le taimi e oti ai. O le taimi e ‘ata’ata ai ma le taimi e tagi ai. O le taimi o le tagitu’i ma le taimi o le sa’asa’a. E o’o a i vaitau o le soifuaga, fai mai le Failauga, ‘e lē mafai. E lē mafai ‘e le malosi o le tagata, ona taumafai e pulea ma taumafai e suia. Aiseā? Ua mae’a ona fa’ata’oto e le Atua ana fuafauga. O le pule faito’atasi a le Atua, ‘e lē ‘o le tagata.

Ioe.

Tutuila ma Manu’a

O lea le fa’amanatu tāua o le talalelei mo ‘i tatou. Ia aua ne ‘i ‘avea le pisi ma ala e lē galue ai. Ia ‘aua fo’i ne ‘i ‘avea le pisi ma mafua’aga e lē malōlō ai. O le pisi e lē fia galue, o le pisi lenā a le tagata ua lofitūina, le tagata ua lolofitūina lona mafaufau, e tau fa’avasega le soifuaga, ‘ona ‘avea lea ma pisi ma ona fa’amoemoega, ‘ae galo ai, galo ai le vala’auina ‘autū, o le alofa ma le fa’amaoni o le ‘auauna atu. 

Le atunu’u e, ia toe sasa’a le fafao ma toe timata le ‘upega. Se ‘i toe silasila toto’a, auā o le tasi lea o fa’afitauli, ‘ua a’afia ai o tatou lotoifale. Ua pisi tele, ua lē galue ai. Ua pisi tele i galuega, ua lē mafai ai ona maua mafutaga ma ‘āiga. Ua pisi tele ua lē mafai ai ona mafuta ma fanau, e pei ona masani ai ma a’oa’oina mai ai e tua’ā ua lagomau mai ti’asā. O afiafi fa’ale’āiga, e fa’asoa, e fa’atonu, e a’oa’o ma tu’utaliga atu le poto i le tama ma le teine. Ua ‘avea fo’i le pisi ma mafua’aga ua galo ai le Aso Sā pa’ia o le Atua. O le aso e tapua’i ai, o le aso e vivi’i ai ma fa’afetaia ai le alofa o le Atua, ‘e lē ‘o le mafua’aga ‘ea lenā, le atunu’u pele, ‘ua vā ai le fogāva’a. 

E lē ‘o le mafua’aga lea, ‘o le tele o mea ua tutupu i lo tatou atunu’u, i totonu o ‘āiga, o nu’u, ua o’o a i le ekalesia ma le talalelei. Pisi, ‘ua lē mafai ona ‘auai, pisi, ‘ua lē galue ai. I le ma lea, Tutuila ma Manu’a, e tāua le malōlō. 

O le malōlō, ‘e lē na’o le moe. O le malōlō ‘e le  na ‘o le nofonofo. Leai. 

Fai mai le Failauga, o lo tatou malōlō, o se fa’ailoga o le fa’atuatua, o se fa’ailoga o le fa’atuatua loto malie, o le malōlō mai galuega, o le fa’ailoga lea ua ‘e fa’atuatuaina le Atua o le ola, pe ‘a tofafā, e tausia, e leoleoina, e malutia, e ta’ita’iina, e puipuia ‘e ‘a’ao alofa o le Atua, auā o ia o le leoleo mamoe lelei. 

O le malōlō, o se meaalofa mai le Atua, ina ia tatou toe fa’afouina le malosi, ma iloa ai le matagofie o le ola, o lona uiga, le atunu’u e, o le a’oa’o mai o le poto o Solomona, ua mae’a ona fa’ata’o’oto e le Atua fuafuaga uma mo le gasologa o le soifuaga. O Iesu Keriso lava ia, o le fa’aa’oa’oga sili lea mo i tatou uma, e ui o ia o le alo o le Atua e to’atasi, e ui o iā te ia le malosi uma lava, e ui o iā te ia le poto ma le atamai, ‘ae silafia lelei e Keriso, e tatau ona malōlō teisi. Na afe lava ma malōlō e tatalo i lona Tamā, ‘auā le feagai ai ma lana misiona. A lea na tini taulau ma tini taunu’u i luga o le satauro matagā, le la’au inosia, le la’au tauemua, na liua e Keriso ‘e avea ma la’au o le olataga, e ala i lona maliu, tanumia, ma toe tū manumālō mai le oti ma le tu’ugamau, ina ia o tatou maua le manuia o lona mālō e fa’avavau, e ala i le salamō fa’amaoni ma fa’atuatua iā te ia, nei e o’o i le fa’avavau.

 

Amene.

 

LAUGAINA LE 'UPU

Rev. Motu La’asia Taufete’e

EFKAS Ma’ama’ā (Tafuna)