FA'ALUPEGA
FA’APU’UPU’UGA O TAFUA
Afio mai taufa’asisina ma alaalamatuātala
Maliu mai lo ‘oulua to’alua ‘o Ulu ma Lemaota, ma le mamalu i le nofoaitu'aiga i le To'iloto
TAFUA
Afio mai le taufa’asisina ma alaalamatuātala
Afio mai Mata’utia ma Tofa
Susū mai Galu ma le ‘autapa’au (Sālū ma Togafau)
Susū mai Nonu ma Salafaioti
Susū mai Sa’u, Ili, Sa’ea ma Taito
Maliu mai Ulu ma Lemaota, fa’apea ‘oe le To’iloto
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O TAFUA (SAVAI'I)
Talofa Sāmoa ma le fa’afofoga
‘Ae se ‘i o’u tala, ‘e uiga i lo’u afio’aga
E pele tasi ‘oe, Tafua i lo’u agaga
Fa’amagalo ita, pe ‘a sesē ‘o se aga
Taufa’asisina ma le Alaalamatuātala
Fa’apea le lua to’alua, ‘o Ulu ma Lemaota
Fa’apea le To’iloto, le To’iloto e faigatā
O ou pa’ia na, Sāmoa ia ‘e iloa
Fa’asolosolo mai lo’u laufanua
E matagofie tele, pe ‘ā ‘e maimoa
Lo’u vaita’ele mai anamua
O le vai o le tava’e, i lalo o le mauga
Aga’i i le tai, ‘ua sui o la’u va’ai
Ua tā ‘o le ‘auala, ‘o mōlī ‘ua malama
Momoli le fa’afetai, susūga iā Liulala
I le atia’eina, ‘o si o’u afio’aga
Se ‘ua fa’amālō, i lau susūga tausiniō
I le atia’eina, ‘o tupulaga lalovaoa
Lo’u faleā’oga, lenei fa’avaomālō
Le Atua ‘o lo ‘o silasila, pese ia mua ia mua ō
E lē fa’agaloina
O faiva alofilima
O nai tua’ā, sa tauasaina mai le vaomatua, fa’apea ou laufanua
Ua iloa ai, le nu’u o Tafua
Sāmoa ne’i galo
Pe ‘e te masalosalo
Tumutumuga o mea uma, ‘e fa’avae i le tatalo
O si o’u nu’u pele, le ola fa’aleagaga
Ua fa’atumulia ai, o fata faitaulaga
Viia le Atua, i se taeao sa afua
Le talalelei ia fa’avae ai ta’ua
O ana ‘au’auna, ia tōfā Fa’a-le-Atua
O Sāmoa ‘ea, ‘e leai se tala e fatu fua