FA'ALUPEGA

Afio mai alo o Sina (Pātea ma Futialo)

Afio mai Nonumālō, o oe o le ma’upū tasi i le ‘āiga Sā Tilialo, o oe fo’i o le tama a le mālō

Maliu mai Luatua ma Gautaala ma ‘upu iā te oe le faletolu

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

TA'ALOGA KIRIKITI

TAMA O LE MAKEI

SALE'IMOA

(Matu'u ma Lēfanoga)

MANONO I ‘ĀIGA I LE TAI

 

Na usu Tolufale iā Sinalaufelo le tama a UTU ma AGI o Sataua i le motu tele o Savaii fa’ae’e le gafa o:

LUAFATAALII MA LUATUTU

O le isi mau e fa'apea na usu Tolufale iā Sinalaufelo le tama teine a Utu ma Agi i Manono fa’ae’e le gafa o tama ‘e to’alua o Luatutu ma Luafataali’i. O ‘i lā’ua ia na pulea le motu i Manono.

Sa nofo Luatutu i Salua, ‘a ‘o Luafataali’i i Faleū. 

Na usu Luatutu iā Sinaotaeoapai i Manono fa’ae’e le gafa e to’atolu le lā fanau:

  1. Puna (O le tupuga lea o Faleapuna)
  2. Manava (O ia lea na iloga ai ona mamalu i Manono)
  3. Ulalemamae (f)

 

 

O le tama lenei o LUATUTU ‘e to'alua lana fanau. 

O Matu’u ma Lēfanoga

O le isi aso na ō ai le ‘auali’i nei ‘e fai le umu ‘e tali ai le sua a lo la tamā.

E fa’apea le mau na pulou le suāvai a tama, ‘ona ō lea ua fa’ase’e i luga o papa i gātai ane lava ‘o le pitonu’u lea ‘o SALUA. E fo'i ane tama ua mū le umu.

Ona ita ai lea o LUATUTU ma fasi le ‘auali’i lenei.

Fai mai na tago atu loa le toea’ina, ua pō Matu'u ‘ona umī ai lea ‘o lona ua, ma liu mai i le manu lea o le MATU'U. Ua toe tago atu le toea’ina, ua pō Lēfanoga, ona liu LULU ai lea 'o le tama, ma felelei ane ai loa manu nei e lua, aga'i i luga o le tuasivi, o le motu lenei o Manono.

Ona toe lele ane lea o le Matu’u ma tū i luga o le papa, ma fa’aigoa ai le papa lenei, ‘e o’o mai i aso nei, o le PAPA O LE MATU'U.

Ae lele ane le LULU aga'i i le itū o le Atu Ā’ana ma maua ai lea i le seuga ‘a le tama lea o POULIULIGAGA i gāuta o le togāvao.

Ona ia ‘aveina ai lea ma fa’atū i le lotoso’a ‘o lona fale.

Ona maua ai lea o le igoa o le pitonu’u lea 'o LOTOSO'A. 

Ua o’o i le isi aso, 'ona tolotolo ane ai lea o le imoa, ona ‘ai ai lea ‘e le LULU lenei ‘a POULIULIGAGA.

Na fai lea o le tama i tagata 'o le nu’u, ua fa’asā ‘ona toe fa’asesegi ma fafasi ni IMOA ona e uma ona ‘ai e lana Lulu.

Ona maua ai lea o le igoa o le nu’u ‘ātoa ‘o

SALE'IMOA5

O lo ‘o iai lava le papa lea o le Matu’u i le motu o Manono, ‘e o’o mai i aso nei. E aliali lava i luga lona tumutumu pe ‘ā sua ane le tai i uta.

Ao le tama o Lēfanoga lea na liu Lulu, ‘o lea na maua ai le igoa ‘o le afio’aga o SALE'IMOA.