April 17, 2023: Flag Day Celebration

Fa'afiafiaga Lona Lua | Second Traditional Performance

Ekalesia Metotisi Sinoti Amerika Samoa

(American Samoa Government)

LOTU TAMAITI

O SE FA'ATA'ITA'IGA MA LE FA'ATULAGAINA O LE POLOKALAMA A LE FANAU MO LE LOTU TAMAITI

 

E mua'i fa'atalofa atu i le pa'ia o lenei sauniga. Le pa'ia o matua, 'aemaise le ekalesia i ona tulaga fa'alupe. Malo le soifua manuia ma le lagi e mama.

(Fa'aopoopo ane 'e 'oe ni isi 'upu e tatala ai se folasaga 'amata)

 

'Ae vala'au atu ma le fa'aaloalo, se 'i o tatou tutula'i, 'a 'o aga'i mai le solo a le fanau, mo le amataina o lenei sauniga.

(Sau le solo ma aga'i mai i luma i nofoa 'ua fa'atulagaina e nonofo ai le fanau ma pepese i le pese "TAMAITI VAVE MAI IA KERISO)"

 

O LE TAPUA'IGA I LE ATUA -------------------------------------------------------------- USU LE AMATA LOTU (AMATA LOTU)

E lelei ona vivi'i atu i le Ali'i, ma ia fai pesega i lou suafa le Silisili 'ese e, ia ta'u atu i le taeao lou alofa, ia ta'u atu fo'i i le po lou fa'amaoni, i le la'au pese e sefulu ona manoa, ma le napeli, ma le leo o le kitara, aua 'ua 'e fa'afiafia mai ia te a'u i lau galuega, le Ali'i e, 'ou te 'alaga fiafia 'ona 'o mea 'ua faia 'e ou 'a'ao." (SALAMO 92:1-4)

 

O LE A TATOU TATALO:

Vivi'i fai a'e o matou loto i lau Afio le Atua i lenei taeao fou. O le taeao 'ua fa'asino mo i matou le fanau. Ua matou mua'i fa'atagisia ai lou mafuta mai, e ala i le mana o lou Agaga Pa'ia. Se 'i 'e utufiaina ma fa'atumuina i matou 'uma. Ina 'ia 'avea ma taulaga 'e malie i ou luma le sauniga 'a faia nei, 'e momoli atu ai lou finagalo, ma tauala mai ai au fa'amanuiaga. Fa'amanuia i le tapua'iga a le nu'u ma le ekalesia, 'ia manuia fo'i le tapua'iga i nai o matou matua, AMENE.

 

O LE A TATOU PEPESE I LE PESE E _________ 

 

O LE FAITAUINA O LE TUSI PA'IA

O le tusi filifilia mo 'i tatou i lenei taeao 'ua maua mai lea i le tusi a Roma 5: 6-11 (Fa'ailoa fa'alua le tusi i luma i tagata lolotu)

Fa'afofoga maia, i le Afioga Pa'ia a le Atua 

Faitau le Tusi Pa'ia (Read the Bible) Faitau felafolafoa'i ai

 

Ia fa'amanuia tele mai le Atua, 'e ala i le tatou fa'alogologo i lana Afioga Pa'ia. Ia tumau ia te ia lona lava vi'iga 'e fa'avavau, fa'avavau lava, AMENE.

 

O LE A TATOU TOE PEPESE I LE PESE E ___________

 

O LE A TATOU IFO MA TATALO I LE ATUA.

FAAFETAI:

Le Atua mamana e, ma Iesu Keriso lo tatou Ali'i Fa'aola. O le vi'iga ma le fa'ane'etaga 'e tumau i lou lava Suafa. O le fa'amanu, ma pesega 'e fa'ane'ene'eina ai lou mamalu. O le tupu o tupu, ma le Ali'i o Ali'i. O le Atua 'e vi'ia, ma e vi'ia pea 'e 'auga-tupulaga 'uma. Fa'afetai 'ina 'ua matou 'aulia manuia mai lenei aso 'e fa'asino mo 'i matou le fanau. Fa'afetai o lo 'o manuia nai o matou matua, 'aiga, 'aemaise le nu'u ma lau ekalesia. Fa'afetai i au Afioga Pa'ia 'aemaise le Agaga Pa'ia 'e fa'amalamalama 'i mea 'uma. O le tumutumu o le fa'afetai, o le galuega fa'aola, 'ua 'avea ma tala lelei. O le tala i le lavea'ina o tagata. O le tala i lona fa'aolaina, 'a 'o agasala pea. O le tala i lona ta'uamiotonuina, e ala ia Iesu Keriso ma lona toto. O ia lava na saunia le leleiga, mo tagata 'uma ma le lalolagi 'atoa. Ia i lau Afio le vi'iga ma le fa'amanu 'e fa'avavau, fa'avavau lava ................ 

 

FA'ATO'ESEGA:

Le tupu e, ma Iesu Keriso le Fa'aola. Ua matou ta'utino atu, o 'i matou lava 'o se fanau 'e tumu i le sese ma le agasala. E sese i matou i lo matou le usiusita'i 'i o matou matua. E sese i le le ava ma tausi i au poloaiga ma au tulafono. E sese 'ina 'ua matou fa'alagolago i se poto 'ua matou maua, 'ae fa'agalo i lau Afio 'o le pogai 'o lo matou ola manuia. Ua matou fa'ato'ese atu, 'ua matou fa'amaulalo atu, le Ali'i e, se 'i 'e fa'amamaina matou i le Isopo ma le 'ie talatala. 'Avea le toto le sala o Iesu Keriso, 'e soloi'esea ai lo matou 'ele'elea. Ia fa'afouina ma fa'apa'iaina i matou 'uma, e ala i lou maliu ma lou toe soifua manumalo mai le oti ma le tu'ugamau. Le Ali'i e, se 'i 'e talia le ifoga a lau fanau i lenei taeao i le suafa o Iesu Keriso le Ali'i ma lo matou Fa'aola.............................

 

MANA'OGA:

Le Atua fa'avavau e, 'o le Atua 'o manuia 'uma. Ia liligi fa'aua mai au fa'amanuiaga i luga o le sauniga nei. Fa'amanuia i o matou matua ma 'aiga. Ia fa'amanuia i le nu'u ma le ekalesia. Ia fa'amanuia mai ia i matou le fanau, 'o e 'ua fa'apitoa iai lenei lava aso. Fa'apa'iaina a matou molimau, 'ina 'ia alu ma le mana au Afioga folafola. Ia fa'atumauina lava ia te oe le vi'iga, 'e fa'avavau. E matou manatua fanau 'uma 'o le lalolagi, ia tupu ma olaola lou finagalo, "Ia tu'u mai tamaiti 'e omai ia te 'oe. Aua le vaoia, 'aua 'e fa'apei o i latou nei, o e o i le malo oi le lagi...... Keriso e, 'o oe lava o le tala lelei mo tagata 'uma. I le suafa manumalo o Iesu Keriso 'ua ala atu ai lo matou tatalo. AMENE. 

 

O LE A TATOU PEPESE I LE PESE E ________

 

LAUGA TOFIA:

O le lauga i le suafa manumalo o le Atua le Tama, le Alo, ma le Agaga Pa'ia. AMENE.

Ua maua le matua o le lauga mai le tusi sa faitauina:

Roma 5:8 O lo 'o iai 'upu nei: "A 'ua fa'aalitinoina mai 'e le Atua lona lava alofa ia te i tatou, 'ina 'ua maliu Keriso ma sui o i tatou, 'a 'o tatou agasala pea."

 

MANATU 'AUTU: "O LE TALA LELEI MO TAGATA 'UMA" (THE GOOD NEWS FOR ALL) 

O le tasi lenei finauga 'ua lauiloa ai le Aposetolo 'o nu'u 'ese. 'O lona finau atu i le alofa o le Atua. Fai mai Paulo, o le alofa 'e uiga 'ese. O le alofa, 'e ofoofogia. Le Atua ma lona alofa, 'ua patino lava na 'o le Atua. O le tagata, 'e alofa fuafua. E alofa lava na 'o le tagata 'e pele ia te ia. E alofa fa'apito, na 'o lana fanau. E le alofa fua i isi, se 'i vagana 'ua fai mai se mea lelei. Fai mai Paulo, "E le fa'apena le Atua".

O le ala finau lea o Paulo, 'aua o le Atua 'ua 'amata mea, na mua'i alofa mai. E ui lava 'ina te'ena pea 'e le tagata, 'ae alofa mai pea le Atua. E le 'i fa'atali se 'i alofa atu le tagata, 'ae 'ona 'o le Atua 'o le alofa lava ia. Fai mai Paulo: "O le alofa o le Atua 'ua fa'aalia mai ia Iesu Keriso, na maliu e sui a'i le tagata, 'a 'o agasala pea.

Le ekalesia e, o ai 'ea le tagata 'ua alofa mai ai pea le Atua? Ioe, talia loa le Atua 'ua vala'au mai. O le ala lena na 'auina mai ai Iesu Keriso. E sui a'i i lo tatou ola to'ilalo. AMENE.

 

O LE A TATOU TOE PEPESE I LE PESE E ________

 

 

SAUNI FOLASAGA A VASEGA TA'ITASI

 

VASEGA AMATA

VASEGA LAITI

VASEGA FEOLOOLO

VASEGA MATUTUA

VASEGA MATUTUA FAAPITOA

AUTALAVOU

 

 

PESE E FA'A'ULAINA AI LE FANAU

FAI SE 'UPU A LE EKALESIA

 

PESE E AOINA AI LE FOA'I

O LE TATALO MO LE FOA'I MA LE TATALO FA'AMANUIA

O le vi'iga ma le fa'afetai 'e tumau i lou suafa le Silisili ese. Ona 'o au foa'i ma au fa'amanuiaga. Ua matou ofoina atu, 'ina 'ia 'e fa'amanuia ma fa'apa'iaina mo lo matou fa'aaogaina. Ua matou tau mai i le fa'ai'uga o lenei sauniga, le Ali'i e, 'e fo'i atu lava ia te oe le fa'amanu ma le fa'ane'etaga. Ia tumau mai i o matou luga 'uma lava lou manuia le Atua le Tama, le Alo, ma le Agaga Pa'ia. AMENE.

 

PESE FA'AI'ULOTU

IA MANUIA TELE LE ASO SA MO TAMAITI 'UMA 'O LE LALOLAGI

FA'AMANATUGA

 

Lo matou Tama Paia e, 'ua matou ta'utino atu, 'ua matou agasala i lau Afio 'atoa ma e 'ua matou tua'oi. Ua o 'ese so'o i matou mai i ou ala. Ua matou mulimuli atu i mana'o o matou loto, ma 'ua maua i matou 'e le ali'i o lenei lalolagi. Ua matou ta'ua so'o lou suafa 'ae 'ua matou le ofoina atu o matou olaga mo lau Afio. O lea 'ua matou 'ai'oi atu ai i lau Afio, 'ia 'e alofa ma fa'amagalo mai ia te i matou, 'ina 'ia maua ai i matou i le Agaga o lau Afio ma matou fa'amagalo atu ai i o matou uso ma 'au'auna atu i lau Afio i le ola fou, 'ina 'ia vi'ia ai lou suafa. AMENE.

 

Fa'afofoga mai 'i 'upu alofa a le Atua ia i latou 'uma 'o e 'ua liliu atu ia te ia, e ala ia Iesu Keriso.

Ia outou omai ia te a'u, 'outou 'uma o e tigaina ma mafatia i avega, o a'u fo'i e malolo ai outou. O le 'upu moni lenei, 'e tatau lava ona matua talia, na maliu mai Keriso Iesu i le lalolagi, 'e na te fa'aolaina 'o e agasala. O'u uso e, pele 'ona 'o le Ali'i, fa'alatalata maia i le La'oai Pa'ia ma fa'afofoga mai i Afioga alofa a lo tatou Ali'i o Iesu Keriso.

 

O a'u nei o le Areto 'o le Ola, 'o le sau ia te a'u, 'e le laina lava ia, 'o le fa'atuatua fo'i ia te a'u, 'e le toe fia inu lava ia, 'o ia fo'i e sau ia te a'u, 'ou te le tulia lava i fafo. Amuia e fia 'a'ai ma fia inu i le amiotonu 'aua e ma'o'ona i latou. Fa'auta, o le mea e matua lelei ma le matagofie lava pe 'a nonofo fa'atasi 'o uso.

 

I lea lava po, na fa'alataina ai le Ali'i o Iesu. Na ia tago ai i le Areto. Ona tofitofi ai lea ma 'ua fa'apea atu, "Ina tago ia 'iina 'a'ai. O lo'u tino lenei 'ua tofitofi e fai ma sui o outou, 'ia 'outou faia lenei mea ma fa'amanatuga ia te a'u. Fa'amolemole, 'afai 'o le 'a 'outou tau'a'aoina loa le Areto, ia 'outou talia loa ma le agaga fa'afetai.

 

Le 'aufaigaluega a le Atua i lenei taeao, 'ia 'outou manatua, 'ua vala'auina 'outou 'e le Atua, 'e fai ma sui 'o le 'aufaigaluega a le Atua, i le tufatufaina o le Areto ma le Uaina. Afai 'o le 'a 'outou o, 'ia 'outou iloa 'o le fa'atusa o le tino ma le toto 'o lo tatou Ali'i o lo 'o 'outou 'aveina atu i lana lafu mamoe. Ia outou fa'aeteete. Ia fa'amanuia le Atua ia te 'outou ma 'ia 'outou o atu ma le manuia.

 

Ua ia fa'apea fo'i i le Ipu 'ina 'ua 'uma 'ona latou 'a'ai. Ua ia fa'apea atu: "O le Ipu lenei o le feagaiga fou lea i lo'u toto, 'ia 'outou faia lenei mea ma fa'amanatuga ia te a'u i aso 'uma tou te feinu ai. Afai 'o le 'a 'outou tau'a'aoina loa le toto o Iesu Keriso, 'ia outou talia loa.