Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

FA'ALUPEGA

 

Afio mai Lealaisalanoa, le tei o Tupua, o le tama a maliliefa

Afio le Autapa'au (Peleafei)

Susū oulua Tama Matua iā Mulitauaopele ma Fiataui’aulava

Mamalu mai le nofo iā Leatisua ma ‘upu i le Alataua

 

 

EKALESIA FA'APOTOPOTOGA KERISIANO AMERIKA SAMOA (EFKAS) I LAULI'I

SATAURO OLA

O le lauga i le suafa mamalu o le Tolu Tasi Pa’ia.

Amene.

Le atunu’u,  ua tatou iai, o le toe Aso Sā o lenei tausaga, 2025. Ae tāua i le asō, i le Sapati Pa’ia.

 

E tatau ai ona tatou toe tepa i tua, i le savaliga fa’aumiumi o lenei tausaga. O ‘upu manino lava, sa tatou va’aia le matagofie ma mea lelei na faia e le Atua, sa tatou va’aia fo’i fa’alētonu o mea leaga e o’o lava i le agasala, ‘a ‘o le tāua lenā, se ‘i toe fulifulia’i le tōfā ma le utaga, se ‘i sasa’a fa’aoti le muli o le ato, auā se lelei ma se manuia o oe le atunu’u.

 

O le faitauga na aumaia e le faievagelia a Mataio. E manino lava le fa’ata’oto’otoina e Mataio, o le fa’agasologa o le faievagelia. O lea lava e fa’aauau mai tala tau fa’ai’ui’u o le tausaga, ‘a ‘o le amataga, o le la’asaga, o le kalena o lana ekalesia. 

 

Mataio na tusia i le taimi o le fa’alētonu ma le lē mautonu, ua leiloa po ‘o ai e ta’ita’i. O se taimi e pogisā, e pouliuli i le ‘au kerisiano, e tau fili ai se tagata e fai ma ta’ita’i, a’o le nofo fa’atalitali fo’i, i taimi i se Mesia lavea’i, Mesia e iai lona malosi, na te taia le fili, o le Mesia lenā, lea e va’ai ai Iutaia. Ae tulaga ‘ese le fa’amatalaina e Mataio, o le Mesia. O le Mesia e ana le pule uma lava, le aoao ma le silisili ‘ese o le Atua, lea ua va’ai ai Herota. 

 

Ua manatu e sosofa le silisili ‘ese o le Atua. Ina ua fa’alogo Herota, o le ‘a fanau ma valo’ia mai le tama e fai ma tupu o tagata Iutaia. O iinā na fa’aosofia ai lagona, ua manatu Herota ua fa’amata’uina le nofoa o le mālō. O upu manino le atunu’u, o le tasi lenā o vaivaiga, tasi lenā o vaivaiga o le lalolagi lea e ta te ola ai. A va’ai loa ua lamatia le nofoa, fa’atino loa mea sesē. A le maua loa le mea e mana’o ai, sa’ili loa i togafiti leaga. O le talanoaga a Herota ma le au makoi, na fa’ailoa ai e le ‘au makoi le mea o lea e afua ai ona latou solia ai o lau’ele’ele o Petele’ema. Ona fai atu lea o Herota, afai tou te maua lē ua fanau mai, fa’ailoa mai. 

 

Ua taunu’u mea uma i le asia o le pepe o le kerisimasi ‘e le ‘au makoi. Fai mai le tala a Mataio, ua fa’ailoa e agelu i Makoi, aua ne’ i toe uia le ala na ōmai ai, ō i le ala lea, e toe fo’i ai. Sui le ala. Aua le toe alu i le auala tuai, e leai sona aogā. Le atunu’u e, toe o se aga, mou atu le 2025. A leaga le ala na tatou ōmai ai, sui, aua ne’i toe fo’i i le mea na masani ai. Ave ‘ese le ala tuai, sui i se mea lelei, ui i se ala fou, va’ai ni mea fou. Upu manino, o le vala’au lea mo i tatou uma. So ‘o se ta’ita’i lelei, na te va’ai ai i ala fou, na te va’aia le manuia mo le atunu’u, ‘ae ‘aua ne’i toe avea le atunu’u i ala tuai. O ala fou e tupu mai i fa’aaliga o le alofa o le Atua, manuia ai oe Tutuila ma Manu’a. Peita’i, ina ‘ua iloa e Herota, ua le fo’i mai le ‘au makoi, fai lea o le fa’atonuga, i fitafita uma ina ia fasiotia o ē ua fanau mai ua ta’i 2 tausaga, i totonu o Petele’ema, e o’o lava i tuā’oi. A ‘o le matagofie o le tala, e le’i nofonofo iinā le lagi, e le’i saofa’i ai le Atua i le mea ua loto ai Herota. Na fa’ailoa e le agelu iā Iosefa, ‘ave le tama ma lona tinā i Aikupito, ō i le isi nu’u, le nu’u e saogalemū ai. 

O upu manino ma le tu’u sa’o, le atunu’u e, e fa’asino mai le lagi le ala fou, e tatala mai e le Atua le faitoto’a mo oe le atunu’u. Ia e uia se ala fou. Ae sau le fa’aaliga, e ō i Aikupito. O le fesili, Aiseā Aikupito? O le ā le mea ua lē filifilia ai se isi nu’u po ‘o se tasi mālō, ae filifilia lava Aikupito. E lē ‘o galo iā Isaraelu, Aikupito na nofo pologa ai. E lē ‘o galo i le nu’u o le Atua le mea na tigaina ai, ‘a ‘o lea ua sau le fa’aaliga mai le lagi, toe fo’i, e te malu i Aikupito. 

 

O Aikupito, ua lē o toe o se nu’u po ‘o se mālō i le matamataita o Farao. Leai. O se mālō ua fai ma sulufa’iga ma lavea’iina ma le toe fuata’iina. O Aikupito ua fanau ma ola i le lavea’iina. Ua atagia i Aikupito, ua lē toe o se atunu’u o pologa, a ‘ua fai ma lima lavea’i o le Atua, na ola ai le nu’u. E manatu la, e lē so’ona tatala e le Atua le faitoto’a i Aikupito, o iinā e vala’au aga’i ai lona atali’i, auā o Aikupito, o le nu’u sa feagai ma le leaga, ‘a ‘o lea ua fa’afouina. O lea ua lavea’i, lea ua filemū ma to’amalie ai le tagata fiaola. 

 

Le atunu’u e, o faiva na fa’ata’ita’i, o tiute lenā o ali’i ma faipule o se nu’u, ia malu le nu’u ma puipuia le nu’u. E fa’apenā fo’i i totonu o le mālō ma ona ta’ita’i. O fono faitulafono ma le fa’amasinoga, ta te ō i Aikupito, le nu’u ua lavea’iina, lavea’i le atunu’u, ia manuia le atunu’u, ia saogalemū le atunu’u. E mafua mai i le lagi, ona lavea’i le nu’u.

 

O upu manino ma upu tu’usa’o, ua tele nauā fuāla’au fa’asāina, ua fa’atama’ia fanau, ua lē mau masino ma fa’asalāvei le olaga, e o’o a i le pule i le ola, le vala’au lenā mo ta’ita’i o le atunu’u, va’ai ni mea fou, e laugatasia ma ola ai le atunu’u, lou faiva fa’ata’ita’i fa’alemālō, fa’aleekalesia, fa’alenu’u, ta amata, ma ta tautatala i le mea lea na fai ai le tala a le faisalamo i lana pese, salamo sa faitauina. O le vala’au, “It is a call”. Ua lē na ‘o se vala’au, ‘ae o le vala’au mo le atunu’u uma, iā oe Tutuila ma Manu’a. O le vala’au mo le foafoaga uma “It is a universal call”. E ōmai fa’atasi, tutū fa’atasi. O le ā le mea e tatau na fai? ōmai e tapua’i ma vivi’i i le Atua. 

 

Fa’amuamua le Atua i mea uma. Amata mai lava e pei ona aumai e le faisalamo. Amata mai i agelu o le au pa’ia, ma tagata uma o le lalolagi e o’o a iā ta’ua. Fa’amuamua le vivi’i, fa’amuamua le ola tapua’i, a ta o iinā, ona manuia lea o le atunu’u, manuia lea o le mālō, o le fono, nu’u ma afio’aga. O ‘upu manino lava, e felanulanua’i le atunu’u, ua tatou iai i se atunu’u e “very diversity” ‘ae iai le mea e tatou te ō fa’atasi ai, “Diversity in Unity”. O le ā lava le felanulanua’i o le atunu’u, o ā fe’ese’esea’iga o tagata, ‘ae tasi lava le mea e tatau ona tatou faia, ōmai e tapua’i, ōmai e vivi’i i le Atua i taimi uma ma aso uma, tatou ola i se si’osi’omaga e fia vivi’i i le Atua, e tatou te tala’i le pule aoao o le Atua, ia matagofie le pule fa’asoifua a le Atua. 

 

Le atunu’u e, ua amata na vaivai lou ola tapua’i, ua amata ona e tōsina i le matagofie o le lalolagi, ae fa’agalo le Atua e ou le mana uma lava. 

 

O le fautuaga, amata mai i ta’ita’i o le atunu’u, to’a’aga i le lotu, fa’atāua tapua’iga, fa’amamafa le pule fa’asoifua a le Atua. Ona fa’asili lea, e le lagi lo tatou ola i le lalolagi nei. O le vala’au lenā a le faisalamo, ōmai e tapua’i, ōmai se ‘i mulumulu aufoe fa’atasi i le ola fia vivi’i i le Atua. E amata i agelu, o ‘au o le lagi o le ‘au pa’ia, e o’o mai i o tatou tagata , o le vala’au lenā, e manuia ai le atunu’u. Omai e tapua’i, ōmai e fa’aleo i le Atua, e pei ona aumai e le pese. E ui lava ina felanulanua’i ma le tele nauā o mea tutupu i le si’osi’omaga, ‘ae tatau lava ona fa’aavanoa lou taimi, e ōmai fa’atasi e tapua’i, tapua’i i le Atua, auā o le upu moni, ta te tapua’i i le Atua, tapua’i e fa’aleo le tūnoa o le alofa o le Atua, lea e tautala ai le perofeta o Isaia. E tautala le perofeta o Isaia i tulaga ma ‘a’ao alofa o le Atua. “God is a love, very faithful and abiding”. Pau lava le tatou mea e fai i le atunu’u, molimau i le alofa lenā. O le alofa lenā o le Atua e fanau ai le ola tapua’i, auā e a’afia le Atua i lou soifua tapua’i, aua ne’i vaivai, ‘ae afai e leai, fai mai le tala a Mataio, na ia fa’aaogāina upu o le perofeta o Ieremia, ua lagona le leo i Rama, o le aueega ma le fetāgisi, o le tagiauē, ua tagiauē Rasela i lana fanau, e lē mafai ona fa’anāina o ia, ona o i latou ua leai.

O le mea lenā e tupu i le atunu’u, e fa’alogoina i o tatou taliga, le tagi talatala o Rasela i lana fanau. O Rasela o le to’alua o Iakopo, o lo ‘o i le tusi o Kenese. O le tinā o tama e to’alua, o Iosefa ma Peniamina. Sa lē mafai ona ola umi Rasela, se ‘i tausi lana fanau, sa pu’upu’u ona taimi ma maliu ai. O le upu moni, e le ‘i tagi lava Rasela i le va’ai i lana fanau, ona ua vave muta le ola, peita’i o le Rasela lea e tautala ai Ieremia, o lo ‘o tautala Ieremia i le Rasela, o lae nofo mai i le saofa’iga a tamā o le nu’u. 

 

O Rasela o lea e fa’aeaea ai le nu’u. O le saofa’iga lenā o lo ‘o iai Rasela. Ua lē na’o se tinā e tagi talatala i lana fanau, ‘a ‘o lea e saofa’i mai, i le tumutumuga o le saofa’iga o tamā o Isaraelu. 

 

Na ta’ua fo’i e Ieremia, le nofoaga i Rama, o le nofoaga sa ‘ave ai tagata Sā Iutā, ‘e ‘ave fa’atagataotaua i Papelonia, ‘a ‘o nofoaga nei na mafua ai le tagi talatala o Rasela. O le fa’aaogāina la e Mataio o upu o le perofeta o Ieremia, se ‘i tu’ufa’afeagai ma le malosi o Herota. Se ‘i tu’ufa’afeagai i le power o lo ‘o maua i ‘a’ao o le mālō o Roma. Se ‘i ‘aumai le tagi a Rasela, se ‘i fa’afeagai ma le tagata e nofo i lona malosi o Herota. E lagona la le tagi a Rasela, ua logologoā fo’i mea na faia e Herota. O le fesili la mo i tatou ma le a’oa’oga e pei ona aumai e le Tusi Pa’ia. E mafai ona ou fa’apea atu, le atunu’u e, e amata mai i tumutumuga o le mālō, tumutumuga o le atunu’u fa’apea le ekalesia, le manuia o le nu’u, e amata mai i luga le manuia o oe Tutuila ma Manu’a. 

 

E mo’omia iinā ta’ita’i, ta’ita’i le nu’u i le alofa ma le agalelei ma le tūnoa o le Atua, ta ō ai i le tausaga fou. Le atunu’u e, fai lenā mo i tatou uma, fai lenā e fa’amalie ai le loto o le atunu’u, ina ua e ola ma tutupu i le tūnoa i le alofa o le Atua, o iinā e fa’anāina ai Rasela. E fa’atino le alofa lē fa’atuā’oia o le Atua, e tutusa tagata uma, ‘ae lē na ‘o se vaega o tagata. Ae ia ‘e ‘aifilofilo fa’atasi ma lou fia ola tapua’i i le Atua i aso uma. Ta ō la’ia, 2026, ma ta’utino le tūnoa o le alofa o le Atua. 

I le suafa o le Tamā, le Alo ma le Agaga Pa’ia

Amene.

 

LAUGAINA LE ‘UPU

Rev. Elder Iakopo Seumālō

EFKAS Lauli’i

2025

PULEAGA KATOLIKO SAMOA PAGO PAGO I LAULI'I

SAINTS PETER AND PAUL

EKALESIA METOTISI SINOTI AMERIKA SAMOA I LAULI'I

MALAMALAMA O LE OLA

IEOVA IRAE EKALESIA FA'APOTOPOTOGA A LE ATUA (ASSEMBLY OF GOD) I LAULI'I

MAOTA O LE TALALELEI

AMERICAN SAMOA ANGLICAN CHURCH IN LAULI'I

ST. JOHN'S ANGLICAN CHURCH

TA'ALOGA KIRIKITI

TEINE O LE MOLI O LE AVA