PESE MA FATUGA
Pese ma Fatuga o le afio’aga o Ta’ū
Su’e mai lāia se fofō e aogā ‘i le ma’i loto
Pe ‘ā iloga ‘a toe mafai, na ‘o le tepa ‘e lelei ai
Tofā le pele moni ‘o le ‘ā ou te’a
‘Ia ‘e manatua mai sia taule’ale’a
‘O si ota mana’o, ‘o le manatu ‘ua leva
Sā teu i le loto pei o se nusipepa
Pe aga ‘i le vao pe aga ‘i le sami
‘Āfai le feau ‘ua fa’atele a’i
‘Ae mapu i le ta’oto pei se tagata ma’i
E ‘auga i ai i le fia feiloa’i
(Usuina e Fa’alaulā Namulauti 1966)
Pese ma Fatuga o le afio’aga o Fitiuta
Tagi e lo’u māfaufau
‘I la’u ‘ula ‘ua tafea i le ‘a’au
‘A ‘o fea la’u tama le fe’au
Le feū fo’i au aumau
‘Ua lē puaina le manogi o Fale’ula ‘e le to’elau
‘Ae te’i ai nei lo’u loto
‘Ua pei lava ‘o se manu i matagi olo
Ma ‘o se lupe ‘ua tū i se filimoto
‘Ua te’i ane lava ‘ua oso ‘ae le ‘i lua mai ‘o ni olo.
Le Fitiuta ‘ua lē failoto
‘Ua ‘ou ala i le taeao i Namō
Fesili atu ‘i le tautai o mālō
‘Ua gase le ao uliuli mate le manū sā ‘e tō.
Tali:
Le manū o Fiti e tuta mai
Le manū o Toga e tuta mai
Lo’u ata e ‘olo i le vai
Le ta’ata’a i le alititai.
(Usuina e Ioane Ta’aga)
PESE I LE SIAPO
Teine Sāmoa ua vavao
Ua galo le faiga o le siapo
Sau ia e aumai se maunu e totō i lalo
Le u'a ua ola tupu sa'o i luga
Tago ane loa ina tatala
Sae la'ia ma fofo'e le pa'u ia mamā
MUA MUA IA MUA Ō
Sau ia le tausala e
Sauni mai lau faiga
Se’e mai lau papa
Fa’atū i ou luma
Ma le aufaiga tu’u mai i ou tafatafa
Aumai le tutu'a ma au i'e lua
O le i'e molemole ma le i'e talatala
Ma se tanoa vai e fufui ai ou lima
Tu’u u'a i totonu ne'i te'i ua malivaoa
MUA MUA IA MUA Ō
Ua ata mai le tama
I au galuega
Lafo mai le u'a i luga o le papa
Aumai loa le asi e vavalu muamua
Ao le pae e faalauteleina
O le faalaulelei e faamolemole ai
Aumai ma le ta fa’amātūtū ai le vai
Fa’ataatia le u'a i luga o le tutu'a
Sasa ia malū ave loa e lelega
Fa’amafolafola tatao i ni ma’a
Ave e fa’alā ia mago manaia
Aumai loa e puni ae sauni le eleiga
MUA MUA IA MUA Ō
Auē le mafine, le mafine ‘aua le te’i
Ae fa’atatia mai le upeti
Nofo mai i lalo, fofola muamua le lafialalo
Olo i le masoā faapipii le lafialua
Lūlū le 'ele ma le lama
Se ipu popo ‘e tu’u ai o le o'a
Fufui ai o le tata, elei ia manaia
Silasila laia i mamanu o le upeti ua iloga
A ta laupapa o le siapo lenā o le vala
A vali i loa o le siapo lenā o le taloa
A eseese lanu ua taua o le siapo mamanu
Sāmoa ia manatua o ta laei mai anamua
O lau u'a lava ma siapo sa lavalava ai ta mātua
Le ala lea o la'u sau sei faamanatu atu
O laei o Sāmoa, e le ‘avea le mamalu
O LE TAFATOLU LENA
O le tafatolu lena ‘o lo ‘o tu mai
Leulumoega ua feagai ma lomitusi
‘A ‘o Malua, ‘ua fa’ase’ese’e, ‘e aga’i i Sasa’e
‘Ae lumafale ai ‘o le ‘auala tele
TA LA LA LA
Sau ia se ‘i ‘e tepa
Sau ia se ‘i ‘e nofo
I le tafatolu, ‘e malie ai ‘o si o’u loto
Tama e, ‘o le lupe
Ua igoa i le LMS
Tatou o ‘e fa’afiafia
I le mamalu ma le pa’ia
(I Roma) I Roma Fou
(Le nofoaga) I le nofoaga
E a’oa’oina ai le malamalama
Pe ‘afai o le ‘a ‘e ulufale i totonu
Fa’aeteete o lo’u savali ma le ‘aufailotu
Saga e ula ia Malua ‘aua ‘o ia ‘e matua
‘A ‘o le Mualua ‘e le ‘uma lava ‘ae sua
LE EKALESIA, UA GASOLO
(TUSIA E: REV. TOFILAU ALESANA AFAASO)
Le Ekalesia, ‘ua gasolo
I Malua i le fono
Ita e, ‘ua le maunofo
Fealua’i solo
Sa’ili se tasi ‘e tutusa loto
Leai se mea, ‘oute mafaia
‘Ae sili ai ona, o’o mai o le i’uga
O lenei sala, ‘e mata’utia
Po ‘o le oti, ‘oute talia
Le vaveao, le tafa o ata
Ita e, ‘ua moe i loimata
Pe ‘a fa’asolo, ‘ua pei o se ata
O ou foliga i lo’u nei agaga
Lou fatu e, ‘ua tafe toto
Ua vaivai ai lou loto
I lau lupe lena sa olo
I le paolo ona tolotolo
Sei agi maia le toelau
I lou nei mafaufau
Ou te popole nei le taulau
O lou alofa ia tumau
FAI MAI O LALO LAVA O LE TALIE
Faimai o lalo lava o le talie
I tala ane o le fale vali e
Na punonou ai o ali’i o le komiti
Ua ta’ua o le Papa o Misi
Pepese ia (i le pese)
Fa’afetai (i le lagi)
Ua aofia mai le Ekalesia
I le Ma’a o le Tusi Paia
Mati’amati’aitu’au
Finao ma Vaitu’utu’u
Na sunu’i ai le mālō o le Atua
Na valo’ia e Nafanua
Gasolosolo mai o isi lotu
E fa’aali o le mau tāofi
A ua mautū le fa’avae o le ‘upu moni
Ua to’ilalo ai Sēoli
UA LILIGO LE FOGATIA
Ua liligo le fogatia
I le mamalu ‘o le vala’aulia
Ua paū le tuāvao
Auā ‘ua ‘ātoa o pa’ia
Ua futiafu e tasi
‘Ua ‘ātoa tupe i le fafao
‘Ae le fa’agalo Afi’a i si ona vao
‘A ‘o le a sau silasila
Alofagia fa’amagalo ita
‘A ‘o mata o māasiasi
‘Ua ‘ou savali ata o le mativa
O lou alofa foa’i
Na sa’ili i le sami ma le vao
Talofa, ‘ua ulufia ‘o lou ‘a’ao
Ua logo le Naiatea, ‘ua logo fo’i le Naiama
Ua silamiō o tagata, lea ‘ua va’ai i ou mata
Ua maualuga le aso, i lau tali fa’aaloalo
O le ‘a teu mau ‘oe i lo’u loto
A sau se itūlā
E tete’a ma fa’atōfā
Aumai le mavaega
A Tuifiti ma Tuimanu’a
O lau teu fa’aaloalo
O le ‘a lē paleina
Ae teu i le va o lou fatu ma lo’u māmā