FA'ALUPEGA
Afio mai le ‘āiga pa’ia o Sālevalasi ma le latou tama (Mata’afa)
Afio mai le sa’ofa’apito, o lau afioga Fiame, o le afioga tutasi, afio mai le sa’opāpā o lau afioga Fiame, a lafalafa tuna, o oe o le Tuiatua
Afio mai le faleagafulu a Fiame
Afio mai ē na ulua’i sa’o (Tupuola ma Seigafolava)
Afio mai Samatauā, o le na ulumatua i tofiga
Afio mai le falevalu a Seigafolava
Susū mai Amituana’i, o oe o le ali’i o le ao, o le tupu tānoa ‘ese, o oe fo’i o le tama a aitu ma tagata.
Afifio mai oulua o fa’auluuluga o le ‘āiga Sālevalasi (Teoteo ma Tumanuvao)
Maliu mai ali’imau o faleupolu (Lemauga ma Fotua’aututusa)
Mamalu maia oe le Faleatua
Susū mai le va’a taumualasi i faigamālō, o oe o le tamasā a Ituau ma Alataua, o lau susuga Sitagata ma lau fa’alauateaga, ma le ‘āiga Sā Sitagata
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O LOTOFAGA
Tapenapena mea uma i le va’a
Oute nofo i tuā i Lotofaga
Ae alu pea oe, o le Matā’afa i le Anapapa
Tago ane i le foeuli, o le matagi o lo ‘o ua tu’umuli
Tatou ō ia, i le tupu e o i Mulifusi
Na tafa’ifā, o Salamasina
Sa ‘ātoatoa iai pāpā
O le Tuiatua, ma le Tuiaana, ma le Nato’aitele, Vaetamasoāli’i mai Safata
Sālevalasi, o le ‘āiga lea
Tulaga mua i le faigāmea
Āiga o tupu, i nu’u uma o Samoa
Sālevalasi, na muamua i pa’ia
Le Tō Sua ma le Pisaga
Vaiuli mai Vaigafa
O laufanua nā o le ‘oli ‘ula pala
Le nu’u e, o le tausala
O lo ‘o teu i le valusaga
Oi Mulifusi e, Tanumāleu ma Lotofaga
Sa tatago le taua e Sale’aaumua
Na fa'asopo'ia i nu’u Ātua
Fa’ato’ā laveia e le fili iā Falemua
Si’i loa le taua, toe maua o le Tuiatua
Ua uma ona tofi, o ‘upu o Samoa
O le atu ua vela, ua fa’asoasoa
Ua lele o le lupe, ma le mea ‘ātoa
Ma le lau olive, nai le va’a o Noa
A’o a’u nei lava, o le la’au o le toafa
E tuputupu mālie, fa’alau sasala
O nai fua o le ‘oli, ‘oli o le foaga
Lo’u ofisa sili, le nu’u o Lotofaga
Tatou mua ia, mua ma le fiafia
Fa’apei o le matai, āiga nai Tapuamia
Sālevalasi e, o le puao matagi e
O upu ua tusia, i le talitali e
GAFA O FIAME LE SA’OFAAPITO MA LE AIGA PA’IA O SA-LEVALASI I LOTOFAGA ATUA:
- Usu Tuiavi’i iā Leteleotalaia le afafine o Mata’afa i Ululoloa faaee le gafa o Taua’aletoa (tama), ma Unusialetoa (teine).
- Usu Taua’aletoa iā Falenaoti le afafine o Tauilili i Amaile faaee le gafa o Tago (tama), Tupuola (tama), ma Pafuti (teine).
- Usu Tupuola le atalii o Tauiliili i Amaile iā Lifuti le afafine o Loai i Lotofaga faaee le gafa o Seigafolava (tama).
- Usu Seigafolava iā Taufagalupe le afafine o Leilua i Sagone faaee le gafa o Samataua Siuolosega (tama).
- USU Samatau’a Siolosega iā Sivaenae le alo o Po’elaga i Lepā, fa’aee le gafa: o Fiame Ufi’avaopupu (tama: O LE ULUA’I FIAME O LOTOFAGA), ma Taufau (teine).
- USU Fiame Ufi’avaopupu iā Levalasi le alo o Tapu o Letaupe i Matatufu, fa’aee le gafa: o Tuiatua (tama matua: O le ali’i o ‘āiga), ma Muāgututi’a (tama: o MUAGUTUTI’A NA SUAFA IĀ FIAME O LOTOFAGA ATUA, na soso’o mai i lona tamā o Fiame Ufi’avaopupu. O le Malae o Lotofaga fa’ato’ā maua iā Fiame Muāgututi’á na si’í e Matatufu i lalo i Matāfagatele, o le ala lea ua ali’i ta’i ai iā Fiame ma sa’ofa’apito iai).
- USU Fiame Muagututi’a le sa’ofaapito iā Masu le alo o Sitagata Timalesa i Lotofaga, fa’aee le gafa: o Leaegalesolo (tama), Fuiava’iliili (tama), Va’asa (teine), ma Va’aloa (teine) – (O le fanau to’afa lenei o lo’o fa’alupe nei i Lotofaga o “ALO-TAU-TINO O LE SA’OFAAPITO UA FIAME”. O le to’afa lenei e filifili po’o ai so latou suli e nofoia le suafa Fiame, pe’ā avanoa.).
- USUIA Va’asa e Fonoti Nofoatolu Laufeti’iti’i mai Mulinu’u i Lufilufi, fa’aee le gafa: o Fonoti Oliovaigafa (tama), Nofoatolu Ti’auliva’a (tama), ma Lagouta (teine) – [Fonoti of Lotofaga Atua].
- Usuia Va’aloa e Luafalemana mai Falefa, faaee le gafa: o Naimanuoletuavao (teine), ma Samugapua’a (tama).
- Usuia Naimanuoletuavao e Leasiolagi Falatugatuga mai Salani, faaee le gafa: o Taufagalupe (teine).
- Usuia Taufagalupe e Sagapolutele mai Muatele i Aleipata, faaee le gafa: o Faulalo (tama), ma Tuafuamamao (teine).
- Usu Faulalo iā Tualauie, faaee le gafa: o Fiame Fa’atala Sipaia (tama).
- Toe usu Faulalo i le afafine o Puni i Samatau, faaee le gafa: o Tinifu.
- Toe usu Faulalo iā Talalaupola le afafine o Tupuola i Ma’asina i Fagaloa, faaee le gafa: o Aigatupu (teine).
- Usuia Tuafuamamao e Leiataua mai Manono, faaee le gafa: o Mulinu’u (tama).
- Usu Mulinu’u iā Tina le afafine o Tuitama i Faleasi’u, faaee le gafa: o Salaevalu (teine).
- USUIA Salaevalu e Faumuina Tafamanu Misimoa mai Lepea i Faleata, faaee le gafa: o Fiame Mata’afa Faumuina Mulinuu (Ⅰ).
O le mavaega a Fiame Muagututi’a le sa’ofa’apito o le Aiga Pa’ia o Sā-Levālasi i Lotofaga Ātua; E na’o i la’ua teine o Va’asa: Fonoti, ma Va’aloa: Fiame na tofia e alaala (Maota) i gatai’ala i malae i Mulifusi ma Tanumāleu, po’o le malae o pāpā o le Aiga Pa’ia o Sā-Levālasi i Lotofaga Ātua
E lua Suli ua iai le Suafa Fiame o Lotofaga.
- Suli o Vaaloa
- Suli o Vaasa
Suli o Vaasa e oo mai iā Mataafa Faumuina Mulinuu I na usu iā Sisavii (alo tama'ta'i o Malietoa Laupepa [ole tuafafine o Malietoa Tanumafili I muamua])
faaee le gafa o Mataafa Fiame Faumuina Mulinūū II......
Usu Mataafa Fiame Mulinūū II iā Fetauimalemau (alo tama'ita'i o Aiono i Fasito'outa) faaee le gafa o FIAME NAOMI MATAAFA FAUMUINA.
Toe tepa ifo i luga po ‘o ai Luafalemana?
Usu Faumuina (ulua'i Faumuina) iā Manalelei po ‘o Talaleomalie faaee le gafa o FONOTI.
Usu Fonoti iā Fuatino (alo o Toalepaialii ma Sinalemanu'a o le great granddaughter o Tuala Tamaalelagi) faaee le gafa o Muagututi'a. Usu Muagututi'a iā Fenunuivao faaee le gafa o Tupua Fuiavailiili (tama-fai ao le suli o Tapulesatele le tama a Salamasina [ao le tuagane o Fofoaivaoese) faaee le gafa o Galumalemana ma Luafalemana ma isi.
O lona uiga lea.
E 4 pito ole gafa e tupuga mai ai Fiame Naomi Mataafa Faumuina.
- MATAAFA
- FIAME
- MALIETOA
- FAUMUINA.