O le lauga i le suafa manumālō o lo tatou Ali’i o Iesu Keriso le alo e to’atasi o lo tatou Atua.

Amene.

O le tusi faitau aso a le Ekalesia Aoao e ta’ita’iina ai lenei aso pa’ia ‘ātoa.

O le tusi faitau e pei ona tatou molimau iai mai le feagaiga tuai ‘o le ‘a maua ai se matua, fa’atasi ai ma le ta’iala a le Ekalesia Aoao e ala i lana fa’asinomaga i lana tusi faitau aso.

Ae ‘ua ‘ou filifilia le fuai’upu e 22 ma le 23 e pei ona fa’atonu mai ‘e le tusi faitau aso. O le matā’upu e 3 o le tusi o le Auega. E fa’apea lona faitauina:

 

O le alofa o le Ali’i ‘ua lē fa’aumatia ai i tatou, ona ‘ua le mavae o lona alofa mutimutivale, e fou mai ia i taeao uma, ‘e tele lou fa’amaoni.

 

O ‘upu ia a le pese tatalo a le fono tatalo. O le fono tatalo a le ‘au’auna puapuagatia. O le tatalo e amata ai le aso fou ma le taeao fou. O le masani o le ta atunu’u, le tapua’iga e mau pea i maota ma fale, o laoa, tamā ma tinā matutua. E tapua’ia le ala usu ma le toe fo’i manuia mai o fanau ma le atunu’u i fe’au ma galuega. 

 

E pūnonou ma fa’amalo’u tumua’i, ‘ae se ‘i sa’ili ma fonō i le Atua, le agaga o le fa’afetai ma le fa’amanū. O le manatu ‘autū o lo ‘o ‘aumaia e le tusi faitau aso. O le olioli o le loto. O ai se ‘ā le fiafia? Ina ‘ua au le taeao, ma maua le taeao fou, o le taeao ua ola, o le taeao ua soifua, aleluia, ma fa’afetaia le agalelei, o le leoleoga a le leoleo mamoe lelei. Sa ia fa’aafu le tōfā a le atunu’u, sa tatou faia le malōlōga i le pō ‘ātoa, leai se tasi na ‘i’ite, na faia ni ana moega miti i lenei taeao fou. Ae fa’auta i le ta’ita’iga a le leoleo mamoe lelei, o le leoleo mamoe lelei e lē moe, e lē tulemoe lava o ia, ‘auā o le leoleo mamoe e tausi feagaiga mo ana mamoe ma lana fanau. 

 

E fai oe mo’u nu’u, o a’u e fai lea ma ou ta’ita’i, e fai le Atua ma o tatou Atua. Ae fa’auta, i le tagi talatala o le pese tatalo i lenei taeao, o le salamo tatalo na amata ai le ala usu a le ‘au’auna, se’i punou i luma o le Atua, se ‘i fa’asifo ma tulivae i le Atua, se ‘i lafo lona loto i le Atua, ‘e fa’afetaia ai ananafi, fa’afetaia ai le tuana’i, o lana leoleoga ma lana ta’ita’iga, se ana le seanoa le Atua, le malōlōga na sautia, ma malōlōga tōfāga a le atunu’u, sa tatou tofāfā ma malōlō i le pō ‘ātoa. 

 

O ai na iluilu ma talotalo i le alofa fa’atamā, i le alofa fa’atinā, i le alofa fa’atausi tama lelei o le Atua, le tausi tama lelei, le Atua o le tausi nu’u lelei, na ia leoleoina le soifua ma le ola fetāloloa’i o le atunu’u. E ā lenei itūaso? I le maleifua mai ma le alafa’i mai, i fanuga lelei ma le matagofie. Ua ia lē finagalo, ina ia soso’o le tōfā ma le fa’atōfā, ua ia lē finagalo ina ia soso’o le moe ma le oti. A ‘o lana fafagu, ua na toe fa’atutū ma fa’atula’i i ta’ua, se alofa iinā tele ma le fa’amaoni o le Atua. 

 

O fuai’upu sa o tatou fa’alogologo ai mai le tusi o Auega. AUEEGA. 

 

Le Atua e, ua ou fia ola. O le uiga lena o le ‘upu Aueega. 

Le Atua e ua ‘ou fia ola. Ua ‘ou le lavā.

Le Atua e, fa’aola mai. 

O le tutulu, o le pese e tagi ma tutulu. O le tatalo ua avea ma pese ma salamo tutulu. O le tutulu o le ‘au’auna puapuagatia. 

 

Fa’amauina o le tutulu a Ieremia, le perofeta ma le ‘au’auna na tofia ‘e le Atua. O le perofeta na amata lana fono tatalo i le taeao fou ma le taeao pō. E amata ai le tagi ma le ‘augani. O le Atua e fou pea ana fa’aaliga, e ui lava i le alafa’i mai o le ‘au’auna a le Atua, o lana perofeta, o loimata maligi, o loifofoga ‘o’ona, na fa’atotō ifo, ona o le tigā ma le pa’i mai o le ola ua tu’ulafoa’iina. 

O le vaitaimi o le tafeaga, ina ua fa’aaogāina e le Atua Papelonia e fai ma ana “AGENTS”. Se ‘i ta’u atu i lona nu’u, se ‘i fa’ailoa atu i lona nu’u, ina ‘ua latou ō ese ma tu’ua le Atua o le ola, ‘a ‘ua latou fa’asaga atu i atua mamate, o tupua ua tā le lau’ele’ele o Sā Kananā. 

 

O le tusi faitau o le feagaiga tuai, o le tutulu a le ‘au’auna a le Atua, o le perofeta. O le perofeta o Ieremia na fa’amatalaina, o le perofeta tagivale. So ‘o se taimi e tautala ai ma ia alagaina ai le fe’au o le talalelei, i ē ua mafatia i avega mamafa, puapuagatia, ‘ua le lavā ‘ona amo.

 

Ae na fa’amoemoe pea i le Atua, na fa’alagolago i le alofa mutimutivale o le Atua, o le tagi a le ‘au’auna i le feagaiga fou, o ‘au’auna, le perofeta ua tagi masūsū i le feagaiga tuai, le perofeta o Ieremia, ma le alo o le Atua ua tutulu. O fea ni ‘au’auna ua tutulu? O fea ni ‘au’auna totofi ua fetāgisi. O le fetāgisi ua fa’anāgatā, fa’anagatā, ona o le tagi ‘e lē mafua mai i le va’ava’ai, ‘a ‘o le tagi e āfua mai i le loto ua o’otia loloto. O iinā lea e fatu mai ai le pese ma le tautala tatalo, ‘a ‘o iinā fo’i lea e mafua ai ona tulivae o lona atali’i pele e to’atasi, ‘ina ‘ua puapuagatia i le mamafa o le fe’au ma le galuega.O le fetāgisi a ‘au’auna puapuagatia. 

 

O le tagi i le tū ma le aganu’u fa’a-Iutaia, e le taitai ona talafeagai ma se ta’ita’i, e sā ona tutulu se ta’ita’i, i le talitonuga masani fa’a-Iutaia. Ona o le latou talitonuga e fa’avavau, a o’o ina tagi ma tutulu se ‘au’auna ma se ta’ita’i, o le fa’ailoga o le fa’alumaina, o le fa’ailoga o le mativa, o le fa’ailoga ua tu’ulafoa’iina, o le fa’ailoga ua faia’ina, ta’ita’i fa’ia’ina, o le fetāgisi a ta’ita’i ua faia’ina. Ua faia’ina ‘ona o le lalolagi ma lona malosi, peita’i ane, o le loto na lafo i le Atua, o le mafua’aga lenā o le olaola pea ma le manavanava o le ola fou ma le moemoe fou, e tupu, o lo ‘o tupu pea, o le fa’amoemoe i le Atua. 

 

O le tagi a le ‘au’auna puapuagatia o Ieremia, ua manatu le ‘au atamamai a le Tusi Pa’ia, ua fa’amatala ai lenei tusi o le Aueega. O le tusi o le Aueega, o le u’unato tautele lava lea o le feagaiga tuai, o le tusi o le Aueega, o le fagu alapasa lea o le feagaiga tuai, e lē ‘o le fagu alapasa e manogi, taugatā ma le anagatā, ‘a ‘o le fagu alapasa ma le u’unato tautele ua matuā taumasuasua lea lava fagu i loimata ‘o’ona a le ‘au’auna a le Atua. 

 

O le tagi a le ‘au’auna a le Atua. Ua matuā lagona i le lau’ele’ele ‘ina ‘ua fa’atāfunaina. Ina ‘ua fa’ata’ape’apeina e Papelonia le nu’u o le Atua o Sā Iutā. E ui ina ua matuā pogisā le lumana’i po ‘o fea a aga’i i ai, e ui lava ina ‘ua leiloa atu luma, ‘ae ‘o lo ‘o mau pea le fa’amoemoe a le ‘au’auna puapuagatia. O le ‘au’auna o lo ‘o fa’atotoe pea e le Atua, le tōfā fa’aleatua, le tōfā fa’aleatua e manatunatu loloto, o le ‘avea ai o tigā ma olioli e fa’avavau. A ‘o fea se auauna ‘e olioli ona o tigā? ‘A ‘o le tagata ua nofofale ai le Atua i le loto ma le agaga. Po ‘o le ā lava lona mafatia, ae na ‘avea lana tatalo e fai lea ma pese ina ia lagona mai e tulu’iga uma o le lalolagi, e fetaia’i pea lo tatou sā, e fetaia’i pea lo tatou faigāmalaga, tigā ma puapuagā, o faigatā o le vasa.

 

O le aueega ‘a le ‘au’auna puapuagatia, ‘ina ‘ua fa’atāfunaina le lau’ele’ele, e ui ina ‘ua matuā leai se mea, ua matuā nuti uma, na talepe uma ‘e le malosi o Papelonia ma ona fitafita. ‘Ae lē fa’avaivai ai le ‘au’auna a le Atua, le perofeta o Ieremia. Ua malepe le malumalu tatalo, le fale tatalo, le talitonuga fa’a-Iutaia, o tulaga ‘a’ao ia o le Atua. O tulaga ‘a’ao o le Atua, e sulufa’i ai le lalolagi, auā ua feso’ota’i mai ai le lagi, e ta’iala lo ta ala, ua malepe, ua fa’atāfunaina le fale tatalo, ua fa’aleagaina, ua tā i lalo. E o’o a i ona lau’ele’ele, o lona tofi na fa’au’uina ma fa’apa’iaina e le Atua, e u’umau, ua tafea, ua leiloa, ‘ua ‘ave’eseina. 

 

E ui la ina ‘ua matuā fa’atāfunaina, ‘ao le tagi a le ‘au’auna puapuagatia, na ia fa’aaogāina ai le malumalu ua fa’aleagaina nutinini’i, ‘ae fa’aaogāina ai le mativa, e fai ma pulela’a. O le falesā ma le fale e tapua’i ai le Sā Iutā ma le Isaraelu, e ui lava ‘ina ‘ua fa’aleagaina, ‘ae mai lea fa’aleagaina, na fa’aaogā ‘e le ‘au’auna a le Atua lea mea ua mālepelepe e fai ma pulela’a. 

O le maofa lena o ē na fa’atotoe ‘e le Atua, ina ia latou fa’aauau le molimau, ‘e iai pea le fa’amoemoe. 

 

O le alofa o le Atua, e suia ai pea le lagona o le tigā, mafatia loloto, avega mamafa i so ‘o se itū, ‘ua lē lavā. Ae fa’auta i le fa’atuatua i le ‘au’auna a le Atua ma lana pese tatalo, ma lana pese ma ona loifofoga, pese tutulu, pese ma le tagi, ina ia iloa e Isaraelu, e fa’avavau le alofa mutimutivale o le Atua. O le alofa ‘e na te lē tu’una lava oe, e ui lava ‘ina ‘ua tatou tu’una le Atua ona o le pupū atu o loto i tuinanau, o fiafiaga o lenei soifuaga ma lenei lalolagi, ‘ae lē mafai ona tu’ulafoa’iina i ta’ua e le Atua.

 

O lona alofa lenā na ia fa’aali ma fa’ailoa atu ai i lana ‘au’auna o Ieremia. 

Ieremia, po ‘o le ā le fa’atotoe o le toafa ina ‘ua matuāā sasa i lalo le mamalu o le nu’u, sa tiu ai le nu’u i lana malumalu tatalo, ‘a o iinā fo’i e te fa’atūina ai se fata faitaulaga i mea ua leaga, o mea ua fa’atāfunaina ‘e te ‘alagaina ai le leo o le fa’amoemoe o le ola fou, taeao fou ma le malosi fou.

 

O le alofa lenā o le Atua. Po ‘o le ā le alafa’i mai i fa’anoanoaga ona o le malaga o le maliu ma le oti, po ‘o a fitā o fa’afitauli e taia ai pea le soifua folau o lo tatou ola taumafai i lenei soifuaga, e lē faigofie, e lē mafai ona tu’ulafoa’iina i tatou, ia fano e fa’avavau. 

 

Lo’u Tamā e, lo’u Tamā e, ‘ave ‘ese ia lenei ipu, ‘ae ‘aua le faia o lo’u loto, ‘a ‘o lou finagalo. 

 

O le tutulu o le alo o le Atua. O le tupu ua tagi, o le tagi a le tupu ma le tagi a le ‘au’auna a le Atua. O tupu ua fetāgisi. ‘A ‘o fea ni tupu ua fetāgisi? ‘A o le tagi na tagi ai i le vaomatua, le alo o le Atua. Ave le Atua i le toafa, ave le Atua i le vaomatua, ave i le mauga, se ‘i alu e tulivae i le mea paganoa. Se ‘i alu e tulivae i le mea ‘e lē maua ai ni tagata ola. Ave se ‘i mafuta ai i le mea lilo. Se ‘i sa’ili ai le malosi fou. Fa’auta i le malosi fou, na maua i le togāvao ma le vaomatua ma le toafa. Fa’auta i le malosi fou, na maua mai i le ola faia’ina ma le ola fa’alumaina. Na ‘aumaia ai e le Atua le leo o le ola. Le pulela’a fou na fa’atūina i mea malepelepe e lana ‘au’auna o Ieremia. Na manava mai ai le manava ola a le Atua, tou te lē tumau i le fa’alumaina e fa’avavau. 

 

O le pulela’a fou na fa’atūina i Kolokota, na onosa’i ai le alo o le Atua. Na o’o a i fanuatanu. O Kolokota na fa’atū ma susunu a’i, le pulela’a fou a le Atua, le koluse o le manumālō, na ‘ave ai ‘e le Atua lana ‘au’auna puapuagatia, o lona alo, sunu’i ai le pulela’a, le mea o lo ‘o tafetotoi ai le toto o tagata agasala e pei o oe ma a’u, fa’atū ai iinā le pulela’a i le vā o le lagi ma le lalolagi, le pulela’a fou lenā, le falesā fou lenā, le u’unato tautele lava lenā, na matuā taumasuasua i le toto mamalu, o le tumu ma le ‘ātoatoa o le Ali’i. Na matuā fa’atotō ifo ma fa’amasa’a, na sasa’a ‘ātoa. O le ola lenā, o le fa’amoemoe ola lenā, ta te iloa a i le Atua i lona alofa ma lona agalelei, na te lē tu’ulafoa’iina lava i tatou. 

 

Se ‘ua lagona le leo i Rama, ua tau fai tagitu’i o le lalolagi, le aueega tele, ua leai se vaipanoa o le lalolagi, ua pa’i ai lē leo tele, fa’ama’i mata’utia ma le ogaoga ma le fasi tagata. A lele ua tumu ai maota tapua’i a le Atua, le taufaitagi auē ua sulufa’i ai ta’ita’i e le gata i Ekalesia, ta’ita’i o mālō, ta’ita’i o nu’u ma atunu’u, ta’ita’i atamamai, ‘ina ‘ua tatou iloa, e fou pea fa’aaliga o le alofa o le Atua. 

 

E alu alu le ta tamāo’aiga o meaalofa o le poto ma le mafaufau tatala, gata. 

E alu alu le ta malosi, e ta te tagitu’i i le Atua, ua ‘ou le mafaia lau galuega. 

 

Ae fa’auta i le alofa o le Atua, fa’aaliga o lona agalelei, o le matua tausi tama lelei. Na ia suia ai tala fa’anoanoa, ‘e avea ma tala o le olioli loloto, e ui lava ina faigatā ona tatou fetaia’i ma lenei fa’ama’i mata’utia ma le fasioti tagata, ‘ae iai pea le fa’amoemoe. 

 

O lo ta fa’amoemoe, ‘e lē ‘o so ta poto, o lo ta olataga ma le ta fa’amoemoe ola, ‘e lē o so ta malosi, le atunu’u e ma le lalolagi e, ‘a ‘o le Atua. 

 

O le Atua na te fa’aali mai ma fa’ailoa mai, ‘a ‘o lona alofa lenā e mātalatala ai o tatou lagona, le fa’aaliga o le agalelei ma le alofa mutimutivale. O le alofa lenā na ‘ātoatoa i le koluse, le pulela’a fou, o le u’unato tautele fou, le fagu alapasa fou, ‘ua ‘aumai ai le toto na sasa’a ma liligi ‘ātoa, o loifofoga pa’ia a lo tatou matai, ‘ua pau lava lea o le vaifofō, e ta te maua ai le malosi, e fa’afouina ai le ta malosi ‘aemaise lo tatou fa’amoemoe. 

 

Manuia le fa’alogologo o le atunu’u i lenei lava itūaso pa’ia. Manuia le faigamālō ma ona ta’ita’i. Manuia le Ekalesia i ona tulaga ‘ese’ese ma o latou ta’ita’i. Manuia nai o tatou tamā ma nai o tatou tinā matutua. Manuia lo tatou atunu’u. Ia malutia e le Atua le soifua ma le ola, fa’atupu atili lo tatou iloa fa’aleagaga, sa’ili atu ai i taimi o fa’anoanoaga, ona ‘o lenei fa’ama’i mata’utia. 

 

I le suafa manumālō o Iesu Keriso o lo tatou Ali’i ma lo tatou Fa’aola

 

Amene.

 

LAUGAINA LE ‘UPU

Rev. John Salilo Fano

EFKAS Faga’itua

2021