LAUGA I LE TAUSAGA FOU
E tomua le fa’atalofa ma fa’afeiloa’i atu i le mamalu o le tatou ekalesia i Asili, Afao ma Atauloma. O le ao fa’alupega i le susuga i le feagaiga ma le faletua, a’oa’o ma o latou faletua, ti’akono ma o latou faletua, tamā ma tinā mātutua se’ia o’o lava i nai a tatou fanau.
O le a ‘ou le toe seu va’ili, pe toe utufia le suati, auā o le matu’u lafalafa, e osofia ai le taumuliava. Oute talitonu sa nanamu a popoā nei filiga o le mafaufau ma ua iso ā manaia i le vai o le tama fo’i lagona o le mata’u ma le fa’amanū i le Atua. E ui lava sa tatou iai i mālologa mai lenā tausaga i le tele o fa’afitauli, lu’itau ma faigatā sa feagai ai ma le lalolagi atoa e pei ona iai le tele o fa’ama’i, mafutaga fa’ale’āiga ua motusia e ala i le maliu ma le oti, o fanau o lo ‘o tagi mai ala, atina’ega o tupulaga ma o latou amioga ma le anoano o mau fitā sa lutia ai i tatou i peau lagavale o le soifuaga.
Peita’i, ua fati le si’ugalu, sala le lago’ele, a’o lenei ua tatou galumua i mālama o le tausaga fou i le sautualasi o le Atua soifua.
A’o le fa’amanatu o le fe’au o le talalelei e siligia le agaga talatala, e afua i le molimolio’o o le fe’au tu’ufa’asolo lea na fa’atino e Elia. Tula’i, sau ina alu e ta’u le fe’au, fai i ai: “E saunia e le Atua mea uma.” Le tōfā saili o le Atua, lea e iai i le fuāi’upu e lima(5) ma le ono(6). O le matua fo’i lenā o lenei afiafi. Ona alu ai lea o ia ma na ia faia e tusa ma le afioga a le Ali’i.
O le fesili, o fea ‘o ou autafa fa’aletagata soifua o ta’oto ai fa’amanuiaga? A’o mafai e lou si’osi’omaga ona utufia lou gālala? O le fa’amoemoe o le Atua i le tagata lea ua au’ili’ili mai e le tusi faitau o lenei afiafi ma lana fa’amamafa: “Aua lava ne’i fa’apopoleina se tasi, e saunia e le Atua mea uma mo le faigāmalaga, e lē fa’atali se’i sau le isi tagata, a’o le fa’autaga alualu mamao a le Atua, lea e mafua ai le tasi o le ‘upu, ‘ae tele ona uiga.
“Sau” “Sauni” “Saunia”. O lona uiga, o le ‘a tele le fa’atinoga a le Atua i lo tou soifua ma si o matou ola i lenei tausaga.
E lua ni manatu tāua e fia fa’alauteleina ai le fe’au o lenei afiafi.
Muamua, o le vafeagai ai o mātua ma o latou fanau, e pei fo’i o le vafeagai ai o le Atua ma Elia.
Lua, o le vafeagai ai o le tagata ma ia lava, e pei o le vafeagai ai o Elia i lana faigāmalaga umi, e ala i le fa’alogo ma le usita’i i le Atua i le taimi e tatau ai.
E tapu le va o mātua ma fanau. E iai le so’otaga na mafua ai ona vavae le manava o le tinā ona maua ai lea o le tagata. A’o le galuega a mātua o le fa’afailele i ‘upu tima’i ma le fa’ata’ita’iga lelei. E taulāmua iai le alofa ma tōmanatu e taula’i i se fa’amoemoega sili ma ni suiga o le olaga. Ua tele fanau ua maua i faigatā o le olaga nei, talu le ola lē usita’i ma le lē fa’alogo i mātua. O totonu o le li’o lea o lo ‘o gaoioi ai le agaga o le Atua auā sa amata mea iinei. Fagufagu ma tu’itu’i atu, ina ‘ia lē mapu le taulogologo.
Fanau, o le taulaga mu lenā, ia fa’aaloalo ma tautua i mātua. O le taulaga e amata atu i le lā oso ae fa’ai’u i le lā goto. Saunia e le Atua se laolao lelei ina ia mausalī le so’otaga a mātua ma o latou fanau i le taimi e tatau ai ma aso e taugalēmū ai.
O le va o le tagata ma ia lava, saunia e le Atua le tino, mafaufau ma le agaga. Silafia e le Atua o taeao ma ananafi e mana’omia ai e Elia le fa’amalositino. O ai e te molimauina? A’o fea e tu ai oe? E te tumutumu mauga, pe e te auvae mauga? O le tali:
Saunia e le Atua le maninoa ma le laolao lelei, ona e iai lava vaivaiga masani i le olaga pe a tatou le tatā i le moa o le ala. E amata iā te oe lenei tausaga ma toe fa’ai’u ia te oe, auā o lea ua tatou molimau i le fa’aaogā ma saunia e le Atua Elia e fai ma fe’au e tauala mai ai lana fa’asoa mo lana fanau. O ala e le’i mafaufauina e tatou, ae mulimuli ane ua saunia ma fa’aaogā ai e le Atua o ta ola. E saunia e le Atua mea uma. A’o mea uma, o Iesu Keriso na saunia mo oe ma a’u. O fa’amanuiaga ia o mea lelei uma.
O le fa’afetai lenā i lenei tausaga fou. Alofa le Atua pule tō tetele. A’o se fa’amanatu i la tatou savaliga umi, fai lea ma fa’alototele i le tatou ekalesia i taimi uma i lana fe’au ma lana galuega. Tusa lava pe lē pale lo’u taofi, ae ia iai se aogā, auā o se mea lelei ma se mea amiotonu, āfai fo’i e lē maua i le taimi nei, e iai lava lona vaitau, e lē tu’ulafoa’ina e le Atua, e iai ona vaipanoa e pei o ‘upu a toeaiina, e iai lava le laolao o le Atua.
Manuia lau susuga i le feagaiga ma le faletua, susuga i a’oa’o ma ti’akono ma o latou faletua, ‘aemaise le loaloa o le tatou ekalesia i Asili, Afao ma Atauloma.
Manuia le tausaga fou i le alofa ma le agalelei o le Atua.
Soifua.
Lauga o le Tausaga Fou
Ekalesia Fa’apotopotoga Kerisiano Amerika Samoa
Asili, Afao ma Atauloma
Sunu’itao Mavaega Ronnie Puletasi Fuimaono Jr.
MOLIMAU I LE MALIU O
FALE'AIGA BURGESS AIOLUPOTEA FUIMAONO
Pe sa’o a’u
Na tautū, na taupapa le so’ai’a a le tupu
Pe moni a upu ‘ua lē faufautū i vaitu’ua o le lanulau’ava.
Le tausala na fa’asua le alofi o le tama ma tata’e.
E taumate i lo’u loto
O folau pea le va’a na si’i mai _________ (nu’u/malaga)
Ao le va’a na tiu i ________(nu’u/fa’atali)
Po ‘o fea ua lele i ai.
Pe sa’o le gagana na tautala ai le pua
Ma pesepese i ili o matagi savili
Ma taia o ta taliga
Fai mai o le fetū na tu mai i le itū
Ua lē pupula.
‘A ‘ua mafua i se ā ona māgoto le ifi
Ma sualua le vai
Ua ta lēiloa le sa’afi na fa’anānā ai tausala
Ma pepese ai tama po ‘o fea o iai.
Oi! E lē tioa ina vāvāō le itū lea
A!!! E moni lā
O le u’ulima na sau sua e latalata mai ua mamao
A’o le unase na fati tamo’e
E taia e tau tia le pa ‘ua magoto
E!!! La’u lupe na olo i le solo
Pese:
La’u lupē ua lele, lele i le vaomāoa
Talofa e i la’u lupe, la’u lupe ua lēiloa
O ta’aga e, o teine o lo ‘o ua gāsolo mai
O’u mata e, tilotilo e te lē ‘o sau ai
Tulou le malae o Ogevai i le mea e afio ai le susuga i le feagaiga taulagi, ma le pa’ia tele o le ekalesia i Petesa Tai. Oute fa’atalofa ma fa’afeiloa’i atu i le tu maualuga ma le maupu’epu’e o le “Mauga o le Atua” i feoi o le talalelei i lau susuga i le feagaiga ma le faletua, a’oa’o ma o latou faletua, poutūtoa o ti’akono ma o latou faletua, tamā ma tinā matutua, se’ia o’o lava i nai a tatou fanau. Ua mafua ai ona tatala “Faitoto’a o le Alofa” i Petesa- Tai nei.
E fa’a’autū la’u molimau i le ‘upu a Iesu i luga o le satauro i le so’o: “Fa’auta, o lou tinā”. Ae o le gagana o le fa’amalieina ua iloa e Iesu, ua o’o lava i puapuaga o mulimuli pea le alofa o le tinā. E ui ina iloa e le tinā, e lē mafai ona ia toe lavea’i mai lana tama mai le satauro, ae sa taumulimuli pea le alofa. Auā o le mea o i ai le alofa, o lo ‘o lotolotoi ai ma le Atua.
E lua ni vaega oute fia molimau i si o’u tinā
Muamua: “O le Alofa”
E iai le vaitau sa ou loto vaivai ai, auā ua fo’i lo’u loto, ona ua pulunaunau i le mea lea e ta’ua e le Tusi Pa’ia: “Ia maua le mapuitigā”. Ae mea ane ua ou savalivali ma feiloa’i ma le tinā. O lana va’ai, ua ‘avea ma fa’aola tōtoga, ma lana tala: “Afai ua ou maua se fa’amanuiaga, ona fa’aauau lea o le galuega. E mafua ona o lou aputi, le apo, le opogi, le fa’amalosiau ma le fa’asinoala lea e fai mai ai Keriso: “Fa’auta, o lo’u tinā lea”.
Lua: “Faiā’oga”
E tasi lava le la’au na fa’aaogā e le tinā i ona faiva o le faiā’oga, o le “Ulimasao”. O le a lea lā’au? O lona faiva fa’afaiā’oga ua ulimasao ai le to’atele o alo ma fanau o le atunu’u. O le tinā e fa’ananau i lana galuega na matauina ai o ia ma faiā’oga o fanau i a’oga ‘amata o le mālō, ā’oga Aso Sa, fātuga o pese, taleni o tala o le Tusi Pa’ia i lotu tamaiti. O mea uma lava ma galuega e fa’atino e le faiā’oga, e toe fa’aalia mulimui lava i galuega a tamaiti ā’oga, auā o lana lea fa’amuamua. O le a’oa’oina, le tuputupu a’e, le fa’ai’uga ma le taunu’uga e o’o iai. Tasi lea faia’oga, auā o a’u fo’i o se tasi o tamaitiiti sa iai i totonu o le li’o lea ma ‘ou molimauina ai le aga malie o lo’u tinā. E le popole lava i le matua o lona soifua na iai. O le ta o se pese malie e amata ai se vasega, e tata’i uma atu iai mafaufau ma fa’alogo tasi uma ai tamaiti ā’oga. Oute manatua ai lava lenei pese ua masani uma ai vasega ‘amata a le mālō:
O le pua e manogi lona fua
E to’ulu’ulu mai ta’ilua
E fa’aputu i le atigipusa
E aogā e su’i ai lau ‘ula
Su’i!
Su’i su’i ‘ia vave
E te alu ma ‘ave i le fale
E va’ai iai lou tinā/tamā
O le pua e manogi aogā
Ua mae’a la’u molimau, o a’u toe ‘upu:
Iesu e, ou te lafoa’i atu lo’u matua tausi o Fale’aiga Burgess Aiolupotea Fuimaono ma lo’u talitonuga maumaututū, o le ‘ā magalo so na āleu i lau galuega togiola.
Manuia lau susuga i le feagaiga ma le faletua ma le mamalu o le tatou ekalesia ua aofaga potopoto.
Soifua ma ia manuia
Tusia e: Sunu’itao Mavaega Ronnie Puletasi Fuimaono Jr.
MOLIMAU I LE MALIU O SAUMALEATO FUIMAONO
Afai ‘oute sau nei ‘e asa lo’u faiva. E lē tatau la ‘ona ‘ou alu asa i totonu o le maota. E toe fai faiva taeao, ‘ae le toe maua manū. O fea e tāua iā oe ma lou finagalo?
Se ‘i tutu le ta moli ga’o
Fa’afeiloa’i atu i le suafa manumālō o lo tatou Ali’i ma le Fa’aola, ‘a ‘o le maupu’epu’e o le Mauga o le Atua i ona ao fa’alupelupea e feagai ma le ata, i lau susuga i le feagaiga ma le faletua, a’oa’o ma o latou faletua, tiakono ma o latou faletua, pa’ia o le ‘aufaigaluega, ‘aemaise uō ma e mamae, o tamā ma tinā matutua, se ‘ia o’o lava i nai a tatou fanau, e molimauina le soifua faitaulaga o Saumaleato i le Atua.
Ua tatala ai faitoto’a o le alofa, ma sopoala le folauga nai le vaiasaga, ma ‘ou tepa i le ala i Māfafa i le pa’ia o ‘āiga i so’u fa’amalumaluga ma so’u ala i mālō. O so’u paolo, ma so’u gafa na si’i i uta ma ta i tai.
E tū tasi lava Ogevai i le malae o Moeitai.
Fai mai na usu i ona itū taulagi ma ona lagi tau’ave ua fa’atauao ma fa’ataumālama i Petesa-Tai nei.
USU LE VI’I O PETESA TAI
O ai na ‘iite, o le ‘a uia ala o le sami, le ‘ea, ma le lau’ele’ele i lenei vaiaso? Aiseā fo’i e sasa’a ai loimata i le ala?
Talofa e,
Ua talatalanoa ona ala, le ala o le lumana’i ‘ua folasia i fa’amoemoega lelei. O le mea moni ua vi’ia le Atua i ona ala, ma ‘o le pogai fo’i lea ‘oute fia molimauina, e afua mai i lenei tapua’iga.
“Na saunia e le Atua ona ala”.
Funa e, se a lau na iā te ia? Pe se saito ‘ea pe se titania? Fa’apotopoto ia ma la’u i le fale e fa’asafua, pule ‘oe, pe fa’asalafa, ‘ā tele, fa’asavala.
Tō mai ma lafo i le talitali
Muamua
“O lona lima mafola”.
O le tū ma le aga lea a lo’u tamā. O le mafola ua tatala. E lē ‘o so na fuafuataga le maualuga, ‘a ‘o le fa’atauva’a e gata mai lona malosi ma lona mafai, na te talia se galuega po ‘o se lu’itau fitā o se taulaga maualuga, ma ‘e manatu ā ia, o se luma lona tagi totogi po ‘o so na molimana’o i se taui.
Fai mai Saumaleato, “Lafo atu i le o lo ‘o fai ‘i ai lenei taulaga, e fuafua mai ‘e ia le taui e tusa ai o le fua na a’oa’oina ma fa’afaileleina ai o ia.
O ai se atali’i e ola mai e lē malamalama i lona tamā?
Oute iloa
E malamalama ai le susuga i le feagaiga iā Eleasaro ma le faletua iā Pitovao Epeleafi’aelepe’āiga. O ona mātua fa’aleagaga.
E malamalama ai le afioga i le ma’upū iā Soli’ai. O lona uso.
O ‘āiga, ma uō mamae, ma uso pele.
Tatala lou lima, o le ala lea sa inainā ai lana tautua ma lē solomuli lana atia’e i le fe’au o le Atua ma lana galuega, o le afu liligi ma le afu toto, e lē ni fa’amata’u i ala o le ‘au’auna atu.
O le tōfā sa’ili i le Atua, le mau tu’ufa’asolo e molimolio’o le fe’au lea na i’u na ‘avea ma ala ua fetalai mai ai le Ali’i, ma ‘o lē fa’amaumau lona ola ona ‘o a’u, e maua ‘e ia.
E! Le fa’ata’ita’iga o le alofa
Se aso, o se tōi’u, se aso o se filiga, ma ‘ua lasi le agalelei.
Lua
O i tatou o tagata, ‘e lē o le ‘autū o mea na faia e le Ali’i ma e tatou te lē pulea ma fa’atonutonu le lalolagi, e leai, o i tatou lava ua ofi i totonu o le tauolaola o le natura, ma ‘o totonu iinā, tatou te maua ai le tomai: O le tomai e atia’e e le filemū.
O le isi lea ala ua saunia e le Atua i si o’u tamā, o le lagimalie o le filemū.
A talanoaina le lagimalie, o lona uiga ua talanoaina le filemū ma le loto maulalo.
Pau lava le tulaga o lea ou te iloa pe afai ua se’e ‘ese loa le toea’ina mai lona tulaga filemū, o le tulaga ua save’u ai le filemū.
Ta le logo, pese, ōmai i pese
Se ‘i o’u tuai mai ‘ua ‘uma a’oga pese. E le ‘i uma atu la’u tala i le mafua’aga ua ‘ou tuai mai ai i pese, ‘ae saviligia loa ma o ta taliga, ‘ina ‘ia maua ai le tulaga tutusa ma le paleni o lona lagimalie.
O le ola fa’atonutonu, o le ala e fa’asoasoa. Afai o le faiva o le mafaufau o le fa’atonutonu ma fa’asoasoa, o le auala fo’i lena sa fai e Saumaleato. E saili ai le fa’ailoilo o le filemū. Na fai ona o le tulaga e aloa’ia. O le aloa’ia o le uso tagata, o le aloa’ia lea o oe lava. O le aloa’ia o le ola, o le aloa’ia lea o le oti. O lana lea taulaga, ia saunia lelei pese o le aufaipese, ma lona talitonuga e momoli ai se vi’iga o le Atua, e tauala atu i le filemū.
O le a fa’ai’ui’u la’u molimau. O le tofi a’oa’o.
Na amata atu i le lāoso ‘ae fa’ai’u i le lāgoto. O le tauavega o le tofi, o lo ‘o iai lu’itau ma fua lelei. E le mafua i so na poto po ‘o so na malosi, e mafua ona o le alofa, o le tali mana’o e afua atu i le ‘a’ao mafola, e tauala atu i le filemū. O le ā se pinefa’amau o la’u molimau ia te outou fanau o fanau, o’u tuafafine, o o’u uso, o’u ‘āiga, uō ma e mamae.
O le nainai a “Daddy”, ua leva na fai mai lava ‘a ‘o tatou lāiti, ‘ae lē sili atu i le nainai 'a le Atua, ‘auā na ia ‘aumaia le tomai ma le malosi, ‘ātoa ai ma le tofotofoga, e sauniuni ai oe mo le mea silisili.
Ua ‘uma la’u molimau. Alofa mai le Atua i le tatou ‘āiga i fa’amaisega ma fa’amafanafanaga.
Amuia e fa’anoanoa, auā e fa’amafanafanaina i latou.
Le mamalu fo’i i le ekalesi i Petesa-Tai nei, i lau susuga i le feagaiga taulagi, maua le tōfā fa’aleatua, lauga ai pea le ‘upu, maua le lua malosi, silisili le malosi o le agaga.
O le ‘ā feula le ta moliga’o.
Fai sau malologa.
‘Aua e te fefe
O ai ma ai na ‘o a’u
Emo le uila e tapasavali
Pa le uila e tapatali
Ma’alo mai matagi
Ma’alo mai le lagi
Ne’i e ui i se ala fa’ala
Tuana’i se ala gaoā
‘Ae ui i se ala fa’alava
Pa se ui, pa se ‘alaga
Soifua le Ali’i
Ia manuia lau malaga
Na saunia e le Atua ona ala.
Soifua
Saunia e:
Sunu'itao Mavaega Ronnie Puletasi Fuimaono Jr.