FA'ALUPEGA
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O SALEIMOA
Tulouna o pa’ia ma faigatā auā le afio o ‘Āiga
Alalata’i o Luatua ma le mamalu i le ga’utala
Afio mai le faletolu fa’apea auauna a le Atua
O lo ‘o tu’i mai le mulipapaga auā se manuia mo le afio’aga
E manatua I lo’u agaga Sale’imoa lo’u i’o’imata i nai ona auala ta ‘e fa’ata’amilo
I le afio’aga
Ma ona mōlī i le pō e pei o se va’aiga i se taulaga
Okaoka e ua ova lo’u nuu i le manaia
Ua goto o le la o le masina
Ua osooso a’e i luga o mauga
Sulugia ai uma le afioaga o ‘āiga
Teine ma tama o le i’a tauoso
Aiaiuli i le igoa
Sale’imoa o si o’u nuu e matalasi i le maimoa
Ua lauiloa iā Sāmoa o le tala iā Malietoa
Na faaifo aso le ali’i ina ua togiola lona atali’i
Maua ai ma le igoa o le fanua
O Fatitū e lata iā Malua
Ma Tofuola o si o’u vai
Afio ane e te fa’amālū ai
Ou te nofo atu i nu’u ‘ese
Le fa’agaloina lo’u nuu pele
Ta’aloga a tupulaga ma evaevaga a teine ma tama
Fa’apea ma autalavou e faavae i le ola fa’aleagaga
Ma itū o fa’afiafiaga ua numera tasi oe i lenei vasa.
TUSIA E:
AVAMUA SO'I SAAGA
VI'IVI'IGA O LE AFIO'AGA O SALEIMOA
A’o ‘ai fo’i lē mua nei
E lē taumate pe ni pese mai fea
‘A ia mālamalama
O le i‘a e nofo i le moana
O le i‘a faifaiāga tau ‘asa
I le tai papa‘ū o le Tuamasaga
Ē, o le i‘a, o le i‘a lava o le gataifale
E ta‘ele, e ta‘ele lava i le tai fānā‘e
Tautai ai lava Sauma‘eafe
Ē, o le i‘a, o le i‘a lava o le gataifale
E ta‘ele, e ta‘ele lava i le tai fānā‘e
Tautai ai lava Sauma‘eafe
‘Ua ō mai tama o le Fa‘asa‘ulala
Se‘i tātou ta‘oto fa‘atafa
Se‘i maimoa ‘uma o Sāmoana
I lau tupe e fa‘imalaga
Se‘i maimoa o lenei to‘ātele
I si au tupe o le a fa‘alele
Se‘i fa‘alele i le vanimonimo
E tafao ai toe alu ifo
‘O nī o‘u paolo ma nī o‘u gafa
‘O lo‘o salalau solo i Sāmoana
‘Ou te manatua nei ‘o le tama
Na ‘ave i le tafeaga
‘A‘o ‘aumau i nu‘u ‘ese
E lē fa‘agaloina ‘oe la‘u pele
E ‘ui na ‘ou ta‘amilō i Sāmoa
‘A‘o lo‘u nu‘u Saleimoa
‘Āiga ma Luatua, ‘o ‘oe le ‘aitu na fa‘ialaga
Le Faletolu, le ga‘uta‘ala ma le itūmālō atoa lava
Tā ō ane e teu le fale ma fofola fala, ‘ua sau le malaga
‘Ua ‘aumai o le mālō , ‘ua talia nei le tōma‘aga
La‘u tupe ‘ua fa‘alēlava
‘Ua mativa tama o le Fa‘asa‘ulala
Lo‘u va‘a ‘ua goto ma le taulaga
E mamao o le Tuamasaga
So‘u ‘āiga ‘o tāu lata mai
‘Alofa se‘i ‘e fa‘asoasoa mai
‘O se meaalofa e te foa‘i mai
‘Ou te talia ma fa‘afetai