FA'ALUPEGA
Afio mai Leilua ma le to’alima ‘o ou alo
(Tau’ili’ili, Tuisa’emo, ‘Ae, Mata’utia, Agavale)
Afio mai Sā Alaalatoa (Pa’u, Letufuga, Tuma’ai) ma le matua o Alaalatoa
Susū mai alo o Malietoa (Moananu ma Taulapapa)
Maliu mai la lua fetalaiga (Tuilagi ma Namulau’ulu)
Maliu mai lē na ‘aimalae (Fau’olo)
Maliu mai ma’upū tufuga ma le lautinalaulelei iā Sāfotulafai
Susū mai Letufuga Pule
Susū mai Letufuga To’atama’i
Susū mai Letufuga Alofa ma lau fa’atufugaga
Maliu mai la ‘oulua fetalaiga Tuilagi ma Namulau’ulu ma le mamalu iā te ‘oe Sāfotulafai
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O SAFOTULAFAI
O Sāfotulafai e, i lo’u nu’u moni e,
O ‘oe ‘o le Puleta’ita’i Salafai e,
E ta’ita’i fo’i ‘oe, i mea matagofie
Auā tupulaga o le lumana’i e.
A aofia Puleono, ‘o oe o le ulua’i to’oto’o
Ua ta fagota i le taimasa, fa’apea le tai o’oo’o
O aso ua mavae, sa su’emālō i le toto
O aso nei, ‘ua manumālō le poto
Afio Leilua ma le to’alima
Sā Alalatoa ma alo o Malietoa
I la lā’ua to’alua ia Tuilagi ma Namulauulu
Le na ‘aimalae ma ma’upū tufuga ma le lautinalaulelei
Iā Safotulafai, si o’u nu’u fai mea mafai
Naunau ma ‘oe le ti’alele
E puipui i le Fa’asalele
A su’efu’efu’e o le tai
O oe lava ‘e te tautai ai
E te lē so’ona gaoia, ‘ae to’a lava lau tōfā
O lau fa’alupega, ‘o ‘oe o le tama ‘e matua
So ‘o se fa’agatama, ‘e te lē solomuli ai lava
E o’o fo’i i fa’afiafiaga, ‘e taualuga lava ‘e si tama
O si ana ta’alo fa’atausala, ‘e vivi’i ai ‘oe ‘e tagata
Si au amio le agamalū laumata ‘ata’ata
Le masina e, ‘ua fa’alao
Fetū e lima, ua sau ta’avao
Le uō moni e, la’u rosa ‘oe
Tumutumu ‘oe lo’u fa’amoemoe
‘Oute lē so’ona faia ‘oe
Afai ‘ua sipa se lamaga
Pe sala fo’i o sa’u gagana
Ia apo i liu aga o fiafiaga
E Lauaki e, ‘o le toa i Sāmoa
Tuilagi ma Taupa’ū ma Tagaloa
Namulaulu, Le’iataua
Malaeulu, Tevaga, I’iga
O i latou ia na malaga i le Atu Mariana
Fa’avae loa o le mau lenei a Pule
Lauaki e, lau fetalaiga ua lupe
Ia ‘ave’ese o Siamani, ‘ae sau Peretania ua tasi
Tautua Victoria o le tupu o le lalolagi
Auē le mālō lea
Sāmoa ‘ua ea
E ui ‘ina tele tausaga ‘o tatali
E pei o le vai o lenā itūlagi
Sāmoa e lenei ‘ua ‘aumai fa’aaliali.
Ua logo loa Solofa (Solf) i lenei ‘upu
Le fuāmanuao ‘o lo ‘ua taunu’u
Leauanae, o fea ‘ea ‘oe
Le ali’i o le itū ma Vaisigano e,
Le faleao e, tu’u mai lou ‘a’ao ‘ua alo lau foe
Sāmoa e, ‘ua ifo i le pulu
Si ā malie ua ova le kuluku
Ua na ‘o matai fa’asusususu ma afakasi e ta’i lua gutu
Talofa e, Sāmoa ‘ua fa’atauina i le ‘upu
Mālōlō ‘ua taumafa o tapa’a
‘Ae taunu’u mai loa le malelega
O Peretania ua i Sāmoa
Ua taunu’u mai le tafeaga
Oi Lauaki e, ‘ua lē toe fo’i mai i Kanana
A ‘ua tu’umālō nei ITARAUWA
Tagi fa’avauvau ai nei le agaga
O ai se tusa ma lea toa, ‘ua tu’umālō lava i le ala
Ona ‘o le musu ne’i ‘avea Sāmoa ma pologa