TAULAGA OLA I LE ATUA O ATUA

I le suafa mamalu o le Tamā, le Alo ma le Agaga Pa’ia.

O le ‘a maua le matua i le tusi faitauina, o se vaega o le fuai’upu 49 ma le 52.

Ua iai ‘upu ia:

O Kaiafa o le ositaulaga sili ia i lea tausaga, ua fai atu o ia iā te ‘i latou, tou te lē iloa lava se mea e tasi, tou te lē mafaufau fo’i, e aogā iā te ‘i tatou ona oti o le tagata e to’atasi mo le nu’u, ia le fano fo’i le nu’u uma lava.

O le manatu ‘autū o le tusi faitau aso o le asō.

O le satauro o le ‘ā ‘aumaia le loto gatasi. The cross will bring unity.

 

I le 1979, na fai ai i matou ma ni isi o sui o tupulaga talavou, matou te malaga i le fono sa fai i Apia i Tamaligi, Sāmoa. O le fono o tupulaga aoao o le EFKAS, o tasi le Ekalesia. Na talanoa mai ai iā te a’u se tasi o toea’ina matua lava. 

Fai mai sa iai ni matai se to’afa ‘o se ‘aulotu na ō atu ia te ia, o lo ‘o fia sa’ili se latou faife’au. O se faife’au e lauga pu’upu’u toe lelei le lauga. Ona fai lea i ai o le toea’ina, ‘a o’o taeao ona tou ō lea i Malua, o lo ‘o fai ai ā’oga lauga i le taimi lenei. O le mea e ta’u o le Sermon Class. Atonu o iinā e maua ai se tou faife’au, ō ‘e fa’alogologo. Ona ō lea o toea’iina e to’afa ia, tala a le tamā matua, ua maua le latou faife’au. E tausaga 4. Fai mai e pu’upu’u o le lauga toe manaia. Filifili loa ‘e le to’afa lea le faife’au lea ma ō loa ma toe fo’i i le nu’u, ua maua le tatou faife’au, ‘e lē faia se palota, faife’au lava lea ua matou manatu o lea lava, o le tatou tofi lea, ona avatu loa lea o le faife’au. 

O le lauga muamua lava a le faife’au, fa’alogo atu le au ali’i ia, o le lauga lea sa fai i Malua, lea na filifili mai ai, lea ua lauga mai. Ona fai mai lea, se ‘i tatou toe onosa’i la, pe iai se isi suiga. 

Lauga lona lua i le Aso Sā o le mea e tasi, loto maulalo ma salamō moni. Ua amata ona lē fiafia le ‘auali’i matai ia. 

Lona tolu toe sau a ‘o le lauga lava lea e tasi ‘e lē suia, ia loto maulalo ma salamō moni. Ua lē lava onosa’i le tamā matua, o le tōfā ua tū i luga, lau susuga i le faife’au, o lau lauga a lea na matou ō atu i Malua ‘o fai, o lea lava ua tolu Aso Sā ‘o fai lava, e leai lava se suiga. Ona faapea mai lea o le faife’au i si ona leo mālū: Malie oe le tamā matua, ua leva ona fia sui la’u lauga, ‘ae ‘oute mana’o ia sui muamua a ‘outou amio, se ‘iloga lava e sui a ‘outou amio, fa’ato’ā sui la’u lauga. 

O le mea lava lenā ua iai aso nei, filifili lauga pupu’u, manaia i le fa’alogo, ‘ae lē moni ona talia e le loto. O le mea lava lea e o’o iai mo le faumālō, ua toe lavelavea ai lava latou, ua manatu latou, ‘o latou lava le pule, tupu ai le vevesi i totonu o ekalesia ma nu’u. E tāua le ola i le ‘upu, ‘ae lē ‘o fa’amatalaga. Suamalie i le fa’alogo.

O le tala a Ioane na faitauina, se mea a ‘ese. Fai e Iesu galuega lelei, e le gata i le fa’amālōlō o tagata mama’i, fafaga tagata e fia afe ma afe, e pei ona tusia e Ioane, mai o isi fo’i o fa’ailoga na faia e Iesu e le’i tusia i le tusi lea, ana fai e tusi uma, e lē ofi le lalolagi i le tele o le Tusi Pa’ia. 

O le galuega ua amana’ia ai tagata uma ‘e le Ali’i, tagata ‘e lē taualoa, tagata matitiva, pologa ma tu’ulafoa’ina, ao lea ua fai ma mea leaga i mafaufau, tagata lotoleaga, tagata saili māsei, fa’avevesi mea.

Ao le mea sili e faanoanoa ai le tala a Ioane. O lea lava fa’ato’ā uma, ona fai vavega Iesu i le toe fa’atūina mai o Lasalo, ua pō fa i le tu’ugamau, na fa’aalia ai le pa’ia ma le mamalu silisili ‘ese, ma le mamana o galuega fa’aola o Keriso. 

O le tala uiga ‘ese lea, ua tupu i gasologa masani o aso fai so’o. I le va’ai ma le fa’alogo o le motu o tagata e to’atele, sa molimauina lea mana, ua toe fa’atūina le tagata ua oti mai le tu’ugamau. O ni isi e to’atele, ua talitonu ma ofo i le mea ua fai e Iesu, ua latou mulimuli iā Iesu, a’ o isi fo’i na iai, ua latou fa’anatinati atu ma ta’u i le ‘au ositaulaga sili mea ua faia e le Ali’i. O iinā na amata ai, ua pupuna le loto ita ma le tigā i toea’iina o le nu’u, le au faresaio ma le ‘au tusi’upu, aemaise le ‘aufailotu Iutaia. Ua amata ona tupu le vevesi, o le ‘aufaitala ia na iai i le mea na tupu, so ‘o se mea lelei lava, ‘e lotolotoi ai ma tagata leaga, e iai fo’i mea e tutupu ai mea leaga.

Fai mai na ‘ona maua lava o le tala, i le mea ua faia e Iesu, fono loa ma le nu’u. Se mea a ‘ese, e fa’atino atu le galuega lavea’i mo ē mafatia, le ‘āiga o nai tinā o Maria ma Mareta, ona o le tuagane e pele i o la loto, ‘a o lea ua fono le nu’u. E tapena se fa’asalaga i le Ali’i Fa’aola, e leai se mea e sala ai, pei se fono ua fai i se tagata ua na faia se solitulafono mamafa e ta’uvalea ai le nu’u. Se mea a ‘ese. Na fa’atino e le Ali’i le galuega alofa mo le manuia o tagata ‘uma, ‘ua leva ona pologa i lalo o le pule’aga i le mālō o Roma, ‘a ‘o lea ‘ua taupulepule e fa’ao’o le oti iā te ia.

O Kaiafa o le ositaulaga sili, o le ta’ita’i ua taulāmua i le tutuina o le afi, e ala mai i ‘upu ua ia fa’agaganaina ai, pei se valo’aga o se perofeta, ‘ae leai, ‘e lē moni, o le perofeta pepelo. Ua manatu, ia fasioti le tagata e to’atasi, ‘ina ‘ia lavea’iina ola o tagata e to’atele o le nu’u mai i lima sauā o le mālō o Roma.

O Kaiafa lava lea e tasi, sa lotolotoi i le taimi o le fa’amasinoga a Iesu. Ua fa’agaganaina le mea moni, o Iesu lava lea, o lou satauro e aumaia le loto tasi i nu’u uma, ‘ua ta’ape’ape solo. Ona o le faumālō ma le fa’asili’aupule i le pule a le Atua, ua uma ona tu’uina mai iā Keriso lona atali’i pele e to’atasi, e faia le leleiga i le vā o le lalolagi agasala ma le Atua pa’ia. 

Ioe le atunu’u pele o Sāmoa. Ua fia afe tausaga ua mavae, o nei tusitusiga ua o’o mai ma Ioane, ‘a ‘o lea lava ua o’o mai iinei onapō, o lo ‘o aliali mai pea lava uiga lava lea e tasi o tatou taimi, o le ola tete’e ma le taupulepule leaga, e fa’aleaga ai mea lelei na fai e isi.

E mai fea taua ma misa, fevaevaea’iga ma vevesiga? E mai fea? mai le loto ua leaga, o le loto ua pulea e le ti’apolo, ua leai se avanoa e fa’ataga ai le Agaga Pa’ia e lima ta’ita’iina lagona ma manatu ina ia manatua, e le ‘i faigofie le taliaina e Iesu, o le fa’asalaga o le satauro matagā, ‘auā o le satauro na faia fa’apitoa e le mālō o Roma, e fa’asala ai tagata faomea, amio leaga ma le fasioti tagata, ‘a ‘o lea ua filifili e le Ali’i e ui ai, ina ia fa’amuta loa le feitaga’i ma le ola fetuia’i. A ia fai le leleiga, ina ia tasi le loto, tasi le fatu, tasi le loto i le Ali’i. E ōmai fa’atasi ai, o le ‘āiga o le Atua ua tasi i lalo o le tafu’e o le satauro manumālō. 

O lea na ‘alaga ai Iesu, i lona toe mānava lava, fai mai: Ua taunu’u. Ia fai lenei mo oe. 

 

Ioe le ‘au pele e.

Satauro ‘e ‘aumaia le loto gatasi. Ae afio a’e le Ali’i, nofo i le itū taumatau o lona Tamā, ‘ae ‘auina mai le Agaga Pa’ia. 

Sāmoa, le atunu’u pele, le Agaga Pa’ia lenā, o le ta malosi’aga lenā tatou te mafai ai ona fa’amaopoopo ma tu’ufa’atasi loto, o se nu’u, o se ‘āiga, o se mālō, aemaise fanau fa’atuatua a ekalesia. 

Fai mai le Atua i lana perofeta, ta’u iā Serupapelu, e lē ‘o le fitafita, e lē ‘o le malosi, ‘a ‘o lou agaga, fetalai mai ai le Ali’i o au. Se mea a ese. O le amana’ia e Iesu o tagata uma, mativa pe tamāo’aiga, malosi pe vaivai, faiavā pe nofotane, ioe, o le isi lea mea fa’avevesi ‘āiga. 

Ua tatou va’ai maulalo nai paolo fai mai. Ia tutusa le faiga o lau fanau moni, tagata ‘ese ua fai paolo mau ma ‘oe i lou ‘āiga. Aiseā? O ni isi faiavā ma nofotane, e ōmai mai ‘āiga a’oa’oina lelei i la le agaga. O tagata ‘ese na. O lea e fa’amaopoopo mea i totonu o ekalesia ma nu’u. O tagata moni o nu’u, o lo ‘o polo mamao mai i tua, faitio, fautua ‘ese i le galuega a matai, ia manatua, e afua mai i mauga manuia o le nu’u. Usita’i ma fa’alogo, ma ia pulea lelei le loto. 

Matai, ta’ita’i, e tatalo fo’i ta’ita’i o mālō, nu’u, ‘āiga, ekalesia ma ‘aulotu. Fa’amolemole faife’au, fa’amalosi tagata e ō i le falesā ua fau ua telē, ae leai ni tagata. O le fale o le Ali’i o le fale tatalo, e sa’ili ai le manuia o le nu’u. Fa’amuamua i au fuafuaga le mea lenā. Toso ma ta’ita’i tagata uma i le falesā, tapua’i fa’atasi i le Ali’i  i le agaga ma le fa’amaoni. 

 

E iai pese fo’i lea e masani ona usu: 

Tasi le loto, tasi le fatu, tasi le ‘āiga, o le lagi ua ia aumaia

To’atuli ma tatalo i le agaga, fesoasoani, ia i tatou uma, ina ia tasi.

 

Ioe, ‘āiga fa’atuatua uma o Sāmoa. O le fe’au lena ma le satauro manumālō o Keriso. Ia galulue fa’atasi tagata uma i le loto maulalo ma ia ta’ita’iina i le mana o le Agaga Pa’ia, ma ia fua tele mai le alofa, o le olioli, o le filemū, onosa’i, agalelei, agamalū, fa’amaoni, mataalofa ma le amio mamā, auā e lē fa’atulafonoina mea fa’apenā. Se mea ua ese, i le alofa tunoa o le Atua, e toe maopoopo ai le fanau a le Atua ua mālepelepe. 

Pese iā Iesu, o lo tatou fa’aola, o lona alofa sili, ia autū ai. Lagi ona vi’i e agelu mamalu. Na ‘o ia e vi’ia i lalo nei. 

 

Amene.

 

LAUGAINA LE ‘UPU

Rev. Isa’ako Mata’utia

EFKAS Masausi

2026