FA'ALUPEGA

Afio mai Auva’a ‘o ‘oe o le tupu fa’anofonofo

Afio mai alo o Sina i lo ‘outou ‘Āiga o Sā Seumanutafa

Susū mai le gafa (Aeau, Ugapo, Faletagoa’i)

Afio mai ma’upū o Nafanua (Solia ma Foa’imea)

Afio mai lau afioga a le matua (Lamositele)

Maliu mai le falefā o le tapua’iga

(Fuiono, Taofinu’u, Soifua, Silialaei)

Maliu mai le lautinalaulelei.



Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

O LE TAMA'ITA'I O NAFANUA 

O le tama’ita’i o Nafanua ‘e pei ona silafia i le taua o le A’ea i Sisifo ma le A’ea i Sasa’e o lo’o ta’oto ai lagisoifua ‘e pei ‘o le Malaeolemā i Fai’a’ai, ‘o le ‘ele’ele o Fesilia’i i Falelima ma le Ulimasao, ‘ātoa ai ma le taua o pāpā ‘e 4 i Tumua na manumālō uma ai lenei tama’ita’i. O le lagisoifua o le suafa Tupa’i i afio’aga ‘o iai ma le ulua’i tafa’ifā o Sāmoa ina ‘ua maua ‘uma e Nafanua ia pāpā o le Tuiātua, Tuiā’ana, Nato’aitele ma le Vaetamasoāli’i.

TAU'ILI'ILI MA TUPA'I O TU'ITU'I O LE TAMA'ITA'I O NAFANUA

O isi toa o Tauili’ili ma Tupa’i le fanau a Tonumaipe’a Sauo’āiga lea na ‘auina mai ai ‘e Nafanua e fa’ato’ilalo le mālō o Tagaloa Sefa’aofonu’u. O lea na ‘avea ai Tauili’ili ma Tupa’i ma tu’itu’i o Nafanua. Ona taunu’u lea o Tupa’i ma Tauili’ili ua tau le taua. O mea na tau ai le taua o Niu-La’aita. 

Ua mole le manava o Tupa’i, ua ta’atia i lalo. Ona tago ifo lea o Tuaili’ili ua liligi iai le vai iā Tupa’i ua toe te’i ai. Ona maua ai lea o le fa’aumi o le suafa o Tupa’i: o “Tupa’ivaililigi”. Na tau pea le taua ma i’u ai ina gagase uma ‘au-tau, lea na fai ai loa le mavaega ma totofi mea ‘aua le nofo filemū. O le ao ‘o le Tonumaipe’a ma le ao o le Tagaloa