O Petesa ‘o lo’u igoa

‘Oute nofo i luga ‘o le malaeva’alele

Sau ‘e te nofo tasi ai

E talitonu Toma ‘ina ‘ua va’ai

Si o’u nu’u ‘e fa’alapotopoto

‘A ‘o le faife’au ‘e ogātotonu

A’e si’omia fa’ata’amilo i le vāi’a’ai ‘o le ‘aufai lotu

 

Tu ma ta lu ma ta tu ma

Aumai lou ulu se ‘i tuma ia fula

Aua ‘e te toe ula, ‘ae fa’alogo i le laulausiva.

EKALESIA FA'APOTOPOTOGA KERISIANO AMERIKA SAMOA I PETESA-TAI

MAUGA O LE ATUA

FAITOTO'A O LE ALOFA

O le lauga i le suafa mamalu o le Atua Tolu Tasi Pa’ia.

AMENE.

Ua maua le matua ‘e ta’ita’iina ai le sauniga i lenei fo’i taeao, mai le tusi sa faitauina.

Isaia lona matā’upu e 43, ‘ae ‘o le ‘a fa’aaogāina le fuai’upu e 7 ma ni isi o le vaega o le fuai’upu muamua, ‘e faia ai le matua o lenei fo’i taeao.

 

O lenei ‘o le ‘a ‘ou toe faitauina

 

O i latou uma ‘ua igoa i lo’u igoa, na ‘ou faia ina ia vi’ia ai a’u, na ‘ou gaosia ma faia lava ‘i latou, ‘aua le fefe, ‘ua ou fa’atauina oe, ‘ua ‘ou vala’auina oe i lou lava igoa

 

O ‘upu o le malelega ma le afioga pa’ū a le Atua o le lagi. O le Atua lea na fa’ata’otoina fa’avae loloto, lea ua fa’agasolosolo ai galuega a le lagi ma le lalolagi. O le fe’au fa’amalosi, ‘e toe lalagaina ai le soifua to’ilalo, ma le ola ‘ua faia’ina, ‘ona ‘o le tagata ‘ua fa’atāfeaina ma ‘ave’esea mai le nu’u ma le tofi na totofi ai ‘e le Atua i le amataga. 

O ‘upu la ia o le matua, ‘o le toe fa’amalosi mai lea, i le loto lea ‘ua ‘avea le tafeaga ma ‘auala ua fa’apeapea atu ai le ola, le ola ua solomuli, le ola ‘ua faia’ina ma le ola ‘ua to’ilalo, ‘ona ‘o lea ua soifua i totonu o nu’u ‘ese. O le soifuaga lea ma le si’osi’omaga lea, ‘ua ola ai le nu’u o le Atua, lea ‘e afua ai le malelega lea, ‘a o le fa’amaumauina fo’i lea ‘e Isaia, ‘ina ‘ia lagona ma papa’i iā Isaraelu le fe’au lea ‘ua ta’oto mai, na ala a i le Atua.

O le Atua na amata mea i le ola, lea fo’i ua fa’aaogāina lava le gagana o le foafoaga, ina ‘ia manatua e Isaraelu, ‘o le ola lava ia, na ‘amata i le Atua. O lea la ‘e iai ‘upu ia. ‘Ua limata’ita’i ai, ‘e le gata i le soifua o le tafeaga, ‘ae manatu a fo’i, fai ma ‘upu ‘e toe fa’amanatu ai, i lau fa’alogo, ‘aemaise fo’i o tatou ‘uma lava, si’ufofoga ma le malelega a le Atua i taimi uma ma aso uma, ‘e a’afia ai le soifua ma le ola o le tagata i fa’afitauli o le ola nei.

 

Aua le fefe, o fea ‘e afua ai le fefe?

O le mea muamua, ‘ona ‘o lea ‘ua sauāina.

O le ola fefe ‘e afua ona o le sauāina i totonu o le tafeaga.

O le si’osi’omaga lea ‘e talanoa ai Isaia, si’osi’omaga o le tafeaga.

‘Ua ‘ave’esea mai ai le tagata lona mamalu. Le mamalu na faia ai ‘o ia ‘e le Atua, e pei lava ona toe fa’amanatu ai ‘e Isaia le foafoaga. Le mamalu na faia ai ‘e le Atua le tagata, na faia lava i le fa’atusa o le Atua. Ina ia mamalu lona finagalo i le lalolagi. Peita’i, o totonu o le tafeaga, lea ua sauāina ai, ma ‘ua ‘ave’esea ai le mamalu lea. E leai se sa’olotoga, leai se leo, ma ‘ua leai ma sona tāua fa’aletagata, ‘ua ‘ave’esea ‘uma ‘e le ola ‘ua fa’atāfeaina.

O sauaga ia, lea ‘e afua ai le fa’amalosi lea. Fa’amalosi ina ia loto tetele, ‘e lē faigofie o le ola i totonu o sauaga. ‘A ‘o se fe’au fa’amafanafana. E fa’amanatu Isaia, o le fe’au fa’amafanafana a le Atua, ‘e lē ‘o ta’oto i ‘upu o le malelega, ‘a ‘o lea ‘e ta’oto i le fa’amafanafanaina o le papa’i mai o le Atua, ‘ina ‘ia fa’alototeleina le tagata ‘ua vaivai ona ‘o sauaga ia. Ina ia maua ai le malosi ‘e ola.

 

Lua, fefe ona o totonu o le si’osi’omaga o le tafeaga, ‘e soifua i se soifuaga pologa.

Fefe ona o le ola fa’apologaina, ‘ua lē toe pulea e le tagata lona lava ala, pule le mālō i le taimi e ala ai ma le taimi e moe ai, pule le mālō pe ‘ai pe leai, pe inu fo’i pe lē inu.

Ua o’o i le itū’āiga si’osi’omaga fo’i lea, ‘ua fa’alagolago le aso o le tagata, i le lelei ‘o lea e pule. A ala ane le pule i le taeao, ‘e lelei lana ala, ona solosolo fifilemū fo’i lea o le soifua o le tagata pologa, ‘ae ‘ā ala ane ‘e lē fetaui le ala, ‘e sousou fo’i le vasa ‘e fesoua’ina ai le tagata pologa ma ‘ua ‘avea ai le ala i le taeao ma se ‘avega mamafa. Ona ‘o lea ‘e soifua i totonu o le si’osi’omaga lea, o le ola fa’apologaina. Ma ‘ua tula’i mai ai le manatu lea, ‘ua amata ona fefe ‘e ola. Ua leai se ma’ema’e, ua leai fo’i se lagona fiafia e tupu ane, ma se lagona fa’agae’etia, i le tāua o le ola o le meaalofa a le Atua, ‘a ‘o lea ua soifua i se soifuaga ua taotaomia i le ola pologa.

 

Tolu

Ua ‘ave’esea mai ia te ia le fa’amoemoe ‘e ola ai. O le taunu’uga tuga lea o le soifua i totonu o le si’osi’omaga lea. O le fa’amativaina o le tagata, i le faamoemoe, o le Atua na faia ai o ia i le amataga. E leai se tagata na faia e le Atua, ‘e le ‘o ta’oto iai lona faamoemoe i le taunu’uga o mea ‘uma na faia ‘e le Atua, na manino a i le amataga.

Na ‘uma loa le ‘upu a le Atua ma lana malelega na amata ai le foafoaga, tu’u loa i le tagata. O lana ‘upu, ‘e fa’aauau ai le galuega foafoa lea.

O le fa’amoemoe lena o le Atua o lo ‘o ta’oto i le soifua ma le ola na ia faia i le amataga i totonu o le si’osi’omaga lea, lea ‘ua ave’esea ai, ‘ua fa’amativaina ai, ma ‘ua le toe lagona ai e le tagata lona tāua, ma le faamoemoe na faia ai e le Atua.

I le ma le tasi, fefe ona ‘o lea ‘ua lē toe vala’auina ‘o ia i lona igoa, le igoa sa fau ao fau pō. Sa fa’ata’oto ma tu’u e mātua, e ala i le miti, e ala fo’i i le feso’ota’i ma le Atua. O le igoa o Isaako, o le atali’i o Aperaamo. Na fa’aigoa e Aperaamo e manatua ai le mana o le alofa tūnoa o le Atua. Fa’aigoa le tama lea iā Isaako ina ia manatua pea, le alofa o le Atua i le tagata ua fa’amativaina i le ola.

Tāua lenā o le igoa, ona o lo ‘o ta’oto ai le fa’asinomaga o le ola. O le igoa o lo ‘o ta’oto ai le fa’atāuaina o le ola, o le meaalofa 'a le Atua i le tagata. ‘A ‘o lea ‘ua fa’aigoaina i totonu o le tafeaga, o tagata ‘ua fa’atāfeaina.

 

O ai la le ‘e ō ane?

O tagata tafea mai i uta. ‘Ae le gata la i le igoa lea ‘ua tā aofa’i ai le to’atele.

‘A ‘ua fa’aigoaina i numera. 

Pologa tasi lea, pologa lua lea, pologa tolu lea

O lea, amata atu i ‘i le galuega lea e fia fa'a‘uma na fai.

E leai ni igoa, ta’oto ai le mamalu. O le uiga lenā o le malelega, o le afioga pa’ū a le Atua. 

Fa’asuafaina ‘e le suafa o le Atua

A ‘ua silafia fo’i e le Atua le tagata lava ia, i lona igoa.

Le agaga lenā ma le fa’amalosi’au lenā.

Fa’amalosi ua tu’ulafoa’i ‘oe ‘e le lalolagi

Fa’apologaina oe ma sauāina oe e le lalolagi

‘A ‘ia ‘e iloa Isaraelu, o lo ‘o iai le Atua

O lo ‘o mafatia fa’atasi le Atua i ou mafatiaga. Pele oe i le Atua

O le agaga lenā o le malelega lea. O le agaga fo’i lenā o le fa’amalosi’au

Ina ia fa’amalosi ai le loto ‘ua fa’avaivaia ‘e le si’osi’omaga o lo ‘o soifua ma ola ai.

 

‘Ae le gata la i lenā, fa’amalosi lea o le malelega a le Atua i le tagata, mo Isaraelu ma lona nu’u, ‘ona o lea ‘o le ‘ā saunia ma tapena e le Atua le togiola. Lea ‘ua tapenaina ma amataina e le Atua le togiola mo lona nu’u, ona ‘aumaia lea ‘e Isaia tala o le tuana’i, toe fa’amanatu iā Isaraelu le togiola na faia ‘e le Atua iā Aikupito. O Aikupito sa iai lana taupulega o ana mālō sa i lalo o lana ta’ita’iga, lona malosi ma lona ma’ema’e, ‘ae na faia ai ‘e le Atua le togiola mo Isaraelu.

Lea fo’i o le ‘a faia e le Atua le togiola mo ‘oe, i totonu o le tafeaga lenā

Ae le gata i lenā, lea ‘ua toe fa’atepa a Isaraelu. Ae le gata iā Aikupito, ‘a ‘o Aitiope

Aitiope e ta’ua ona o le malolosi o ana ‘autau, ma le tekenolosi na fa’aaogāina e Aitiope e fai ai taua. O fea o iai le malosi lenā? Na fa’aaogāina e le Atua, ‘e togiola a’i lona nu’u.

E taua fo’i Sepa. Sepa e ta’ua ona o le auro, lona tamā’oaiga, na ta’uta’ua ai ‘o ia i le lalolagi, ‘ae na tapena ai e le Atua le togiola mo Isaraelu.

Isaraelu, ‘aua ne ‘i galo na tapena e le Atua le togiola mo ‘oe.

Lea ua tapenaina e le Atua le togiola, ‘aua e te fefe. Lea ‘ua ‘au le Atua ma lou tagata vaivai.

Lea la ‘e afua ai ‘upu ia o le poloa’iga ma le malelega, e fa’amalosi ai le loto lea ‘ua fa’avaivai.

Ona ‘o lea ‘ua tapena e le Atua le togiola mo Isaraelu, toe fa’amanatu lea e Isaia, a o’o ina toe fo’i le nu’u, e lē faigofie le ala lea, e lē ‘ese a le ala lea ma le ala lea na ui mai ai i Aikupito e aga mai i totonu i le nu’u filifilia. O le ō ese mai  i Papelonia, e tutupu ai faafitauli ia, lea la e fai mai ai ma fa’amanatu mai ai Isaia: ‘A ‘e sopoia atu vai ma vaitafe, ‘e lē lofia a oe, tapena le ola lea, le soifua ua togiolaina, ma ‘o le ala fo’i lea e toe fo’i ai i le nu’u, ‘ina ‘ua a’e le tafeaga, ‘e lē ‘o se ala faigofie, o le ala e feagai pea le tagata ma lu’itau ma faafitauli ia, fai mai o vai ma vaitafe. 

E feoloolo faafitauli e feagai i le amataga, i lo ‘o faafitauli e fesāga’i ai pea i taimi uma ma aso uma. O le uiga o le soifuaga o lo ‘o soifua ma ola ai le tagata. E fai mai la e le gata o vai, ‘a ‘o totonu o le afi, o le ala lea e ‘a’asa ola le lā, ‘e lē faigofie. Ae fai mai la Isaia, o lana fa’amanatu lea, ‘e lē susunuina ai oe.

Toe fa’amanatu ia Isaia, o le ola fa’amamāina e le Atua, ‘ātoatoa ai le ola ua ofoina i le Atua ma lona finagalo. O le ala lenā o le malelega lea, o le ala fo’i lenā o le fa’amalosi’au lea, ‘e le gata ina ia mafai ai ona toe lalagaina ai le ola ma le faamoemoe i le tagata, ma ia maua ai le ola e fa’amalosi ai, ma le faatuatua e taula’i ai i le Atua le ola, ‘ae tapena ai fo’i le ola i le ala lea, ona e lē faigofie. E feagai le tagata ma faafitauli tūgā o le ola.

E lē ‘ese fo’i le tala lea a Isaia, ma tala a Luka lea na faitauina. Amata tala a Luka o Iesu ma lona soifua i lenei lalolagi, i le tusiga igoa. Lea na fai ai le tusiga igoa o le mālō o Roma.

Ma fa’atonuina ai tagata nu’u uma ‘e ōmai e tusi igoa. Peita’i ane, ‘ua matuā tu’ufa’afeagai a le mea lea na talanoa iai Isaia, o le malelega a le Atua, oute iloa oe i lou a igoa.

A ‘o le tusiga igoa lea a le mālō o Roma, tusi e faitau ai le tamāo’āiga. O le igoa ua faitauina, ona o lea e pipi’i ai ma le tupe e maua e le faigamālō. Tāua lenā o le igoa, ona e maua ai seleni, maua ai le tamāo’āiga, e faatupe ai le tele o fuafuaga a le mālō. O le mafua’aga lenā na manatu ai Luka, ia matuā fa’amatala a le tu’ufaafeagai o mea tetele ia e lua.

Le ta’ita’iga a le mālō o Roma, na tusia ai igoa, ‘ona ‘ua naunau i le tamāo’āiga ina ia fa’atupula’ia, ma le malelega i le lagi, o lo’u atali’i pele oe, ‘ua ou fiafia iā te oe. O oe o le atali’i pele o le Atua, ua fiafia iai lona finagalo. O le agaga ua fa’amatalaina ai, ina ia manatua e le tagata, e pei a ona fetalai ma malele le Atua i le amataga o le feagaiga tuai, lea fo’i ua toe malele, ma ‘o le faavae lea, faavae lea o le galuega tala’i a Iesu Keriso i le lalolagi, na fa’avae i luga o lona mautinoa ma lona iloa, o ia o le atali’i faapelepele o le Atua, ua fiafia iai lona finagalo. Po ‘o ā faafitauli, na feagai ma le Ali’i, i le anoanoa’i o fītā ma faigatā o le galuega lea i le lalolagi, e lē ‘i galo iā Iesu, o ia o le atali’i o le Atua, e mamalu ai le Atua i le lalolagi.

O le mafua’aga lenā o lona ola finau, ‘a ‘o le mafua’aga fo’i lenā o lana toe fo’i a e tatalo, o iinā e maua ai le malosi. E o’o a i le fa’asi’usi’uga o le galuega a Iesu, lea e fa’amatalaina e Luka, le luluti mai o fītā ma faigatā o le ola galue, lea na fa’apea ai ‘upu o lana tatalo, Lo’u Tamā e, ‘ave’ese, ‘ia ‘e ‘ave’ese lenei ipu, ‘ae toe fa’ai’u a i lona leo, ‘ae ‘aua le faia lo’u loto, ‘a ‘o lou finagalo.

Le tagata ‘ua ‘ātoa iai tigā o le ola, ‘ae lē galo ai, o ia o le atali’i o le Atua. O lana ‘upu lea, o lana ‘upu a lea iā Ioane ‘ina ‘ua papatisoinaina. Na vaoia e Ioane le papatisoga, fai mai Ioane e leai, e lē sa’o, ‘e lē o a’u e papatisoa oe, ‘o oe ‘e te papatisoina a’u.

‘Ae fa’apea ‘upu a Iesu, Ioane, ta te faia pea mea tonu. O le ala lea o mea tonu, lea ua papa’i i le loloto o le ola lea, o le faia o mea tonu, e tusa ma le finagalo o le Atua.

Lea ua papa’i a i le ipu lea, ‘a ‘o lea ‘ua faapea ana ‘upu, ‘aua le faia lo’u loto, ‘a ‘o lou finagalo.

I le ma le toe ‘upu i luga o le satauro. Lea fo’i ua toe ‘alaga ai le Ali’i. Ina ‘ua papa’i ane i le tino, fao ia, ma le tao na velo ai i lona itū. Ua papa’i ane i le loloto o le fatu ma le agaga, ma toe ‘alaga ai i le ‘upu lea. “Lo’u Tama e, ‘aiseā ‘ua ‘e tu’ulafoa’i mai ai iā te a’u.”

O ‘upu ia, o lea ‘e fa’amaumauina e Mareko, Lo’u Atua e, ‘aiseā le mea ‘ua ‘e tu’ulafoa’i mai ai iā te a’u.

I luga o le satauro, ua tau’ave ai ‘e le Ali’i tīgā o le ola, le ola ‘ua tu’ulafoa’ina, ma le ola lea ‘ua mafatia i le satauro ‘aemaise le lalolagi lea. E lē galo iā Iesu, o lona Tamā, o le Atua o le lagi. O lana silasila, e silasila i le aotelega o le lalolagi i lona lelei ma lona lumana’i. O lea la na mafua ai ana toe ‘upu a: “Ua taunu’u”.

Ua tau i le nu’u, ua tau i le lalolagi, ua tau i totonu o ‘āiga, ua tau i totonu o mālō, ua faia le finagalo o le Atua. O le mafua’aga lenā ‘ua ‘aumai ai ‘e Luka le amataga lea, ‘ina ‘ia malamalama pea i le faavae lea, ona o le malosi lenā, o ia o le atali’i pele o le Atua, ‘a ‘o le Atua, ‘o lona Tamā.

Fa’afofoga le atunu’u i lenei taeao, ‘ua sauāina fanau i totonu o ‘āiga.

O totonu o le si’osi’omaga na fausia ma atina’e e nai o tatou tua’ā, ‘e fa’afailele ai le ola, ma fa’afailele ai le fa’asinomaga o ‘āiga ma fa’afailele ai tofiga o nu’u. 

Le pepe i lona fanau mai i totonu o ‘āiga Sāmoa, sa fau i le ao fau i le pō, le igoa e fa’aigoa ai, ona ‘e tāua le igoa, tāua le ola, pepe lenā sa sapaia i lou fatafata, tamā ma le tinā. Sa tātā fa’atasi lona fatu ma ō ‘oulua fatu. O totonu o ‘āiga faitele, si’i atu si’i ane, fa’afuata atu, fa’afuata ane, e o’o a i totonu o ekalesia, sogi ane lea, sogi atu lea, e mafanafana le papa’i ane o le ola, totonu o le si’osi’omaga lea ‘o le ‘āiga.

7, 8, 9, 10 tausaga, tu’ulafoa’i lea.

O le ola fa’atupulaga, ua mativa i le mafanafana lea

Lea ua lē toe pepe, o le fa’asinomaga o ‘āiga, ‘a ‘o lea ‘ua fai mai, fanau lalovaoa

Tu’ulafoa’i

Tu’ulafoa’i lea ua iai le mālō, e a’oa’oina, fa’atonuina ma fa’atupuina.

Ua leai le mafanafana lea fa’amātua, ua tatou tu’ua’i i le tele o tatou fe’au ma a tatou galuega e tausia ai ‘āiga, o tatou tiute, o lea a na malele ai le Atua i le amataga, o tofiga ia mai le Atua.

O le mea lenā ua fefefe ai ma matata’u ai fanau, ‘ua lē maua le mafanafana lea, ua lē toe lagona le sogi ane lea, le uiga lenā o le malelega a le Atua iā Isaraelu, oute lē tu’ulafoa’i oe, aua le fefe, ‘ua o’o a ina fefefe ai a tatou fanau ‘e ola, ‘ona ‘ua lē maua le mafanafana o le ola lea.

O le ola sauāina fo’i lea e maua i totonu o le mālō, ma le atunu’u tainane le ekalesia, pei a fo’i na talanoa Isaia. 

Le tama ma le teine lea ua i’u mai, ma’ema’e e fia galue, fia fa’aaogā le ola, fia fa’aaogā meaalofa ia i totonu o le mālō, ‘a ‘o lea fo’i ua sauāina ai.

O lea ua lagona i totonu o le mālō ma le atunu’u le sauāina, le ola lē amana’iaina, le ola ua lē fa’atāua ai meaalofa ia a le Atua, ua fa’atamāo’āigaina ai le ola.

‘A ‘o le fa’amalosi la le Atua mo oe

Ala, ala fiafia “everyday is a beautiful day” ‘aua le fa’alagolago lou ola i lou si’osi’omaga, ‘ae fa’alagolago lou ola i le Atua ‘e fou ai pea, lou malosi i aso uma. Po ‘o le a le fa’aletonu o le si’osi’omaga e te soifua ma ola ai, aua ne ‘i galo iā te oe ‘upu o le malelega lea, ‘oute iai a’u fa’atasi ma ‘oe. Aua fo’i nei galo iā te oe, o oe o le atali’i filifili a le Atua, ‘e te faia mea tonu, i totonu ‘o āiga, totonu o nu’u, ekalesia ma le atunu’u.

Auā ‘o oe o le atali’i ma le afafine o le Atua.

Vala’auina 'e le Atua, ina ia aumaia ai lona mamalu i le lalolagi, ina ia mamalu pea le Atua.

Fa’amalosi fo’i lenā mo tatou le ekalesia ‘aemaise fo’i le fa’afofoga a le atunu’u i lenei taeao

O le mafua’aga lenā lea ‘e ‘alagaina ai pea, “Le Atua, pei a ona malele, o a’u o lou Fa’aola.

Mafua’aga fo’i lenā na taulagi ai e le lalolagi Iesu, o ia o le Fa’aola “YESHUA”.

Fa’aola o le lalolagi, auā na to’a iai le lalolagi, pei a na a’oa’o uma ai le ‘au faievagelia

Na to’a iai le lalolagi puapuagatia i lona Fa’aola.

O ia o le Fa’aola o lou soifua vala’auina.

Amene

 

LAUGAINA LE 'UPU

Rev. Elder Eleasaro Fa'ata'a

(Faifeau Toeaina o le Pulega Tafa o Kanana Fou)

UPU FA'AMANUIA I LE 'AUVA'A O LE SATANI