FA'ALUPEGA
Afio Sā Matafeo ma le matua iā Lualua
Afio mai lau afioga Tuifeama’alo
Maliu mai lau fetalaiga Leatuavao ma ‘upu iā Sālepatū ma Salemuli’aga
(E ao lava iā Falenaoti ona fa’amalumalu)
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
O gauta o Asaga e i ai le “Ana o le Imoa”-a’o le igoa tonu o le eleele o loo i ai lea Ana o “Naisa’afa”-o le suafa lea o le Tupu o Amoa-sa nofo ai i lea vaega-eleele- i aso ua mavae.
O totonu o le Ana o loo i ai se vaipuna malūlū ma le manino.
O lo 'o i ai foi se fala e le’i uma ona lalaga-ua liu papa. O lenei fala e faapea le tala-o le fala lava o le teine o Sinalefatumoa.
O tua atu o le vaipuna i luga o le papa- o loo i ai le “Suluga o Pulu Ta’ele” e teu ai pulu ta’ele a le tamaitai- ma le “sulugati’a a Alo”-lea sa masani ona teu ai “Ti’a a le tama o Alo.”
O Sinafatumoa lenei na usu i ai le Alii o Amoa o Naisa’afa -ona maua ai lea o le tama o “Alo.” Le tama lenei e faapea na alu e asu sami i le tasi aso-ae tau atu o fai le taaloga o le “Faatau Moa” i Pu’apu’a.
Ona fo’i lea i uta fai i lona tina-e alu e su’e ane sana moa (Toa)-e alu ma ia i le taaloga. Sa le fiafia i ai Sinalefatumoa-ona alu lea avane le manu o le ‘Ti’otala’ e alu ma le tama o Alo.
O le mea na tupu, na manumalo aoao Alo-ona fai mai le tala-o le moa lava e tau ma le ti’otala-e mautinoa lava e tatogi uma ona mata e le ti’otala ma mamate ai lava. Talu mai na aso –e le’i toe faia lava se ‘faatauga-moa i Pu’apu’a.
Ua o’o i le tasi aso -ona fai lea o le Tagāti’a i Pu’apu’a. Sa auai foi Alo ona o le agaga e fia vaai i lona tamā. Sa fai Sinalefatumoa ia Alo-afai e alu e su’e lona tamā, o le tagata e tau i ai o nofo i luga o le ogalaau-o lona tamā lena.
O le taalo a Alo, o ia e ta-ti’a a’o lona tina-e alu e su’e mai ti’a. Ina ua ta mai le ti’a a Alo mai Papalaulelei i le tasi aso, na alu sa’o lava i le Ana o Meto i Pu’apu’a.
O le ti’a lea ua faaigoaina o le “Ti’a Ulutonu.” E faapea le tala na o uma le nuu o Papalaulelei e saili le ti’a a Alo-ae “Taatia i Paga Ti’a o le Tauti’aga nai Salafai.”
Peitai-e o atu le nuu ae fai mai Meto-‘ia alu atu le tagata e ona ti’a e aumai ana ti’a.”
O le taimi lava na o’o ai le tama i totonu o le Ana o Meto, sa faasaga loa lava Meto tapunipuni uma le Ana ma fai ia Alo-“Ou te le toe tuuina atu oe e te alu pe afai e te le faia le mea ou te mana’o i ai.”
Afai e te le faia se fale mo a’u-e te le toe alu lava. Sa tali Alo -ua lelei. Ona fai atu lea o Meto, “o le ituaiga lenei o fale ou te mana’o i ai.”
“Ou te mana’o i se fale e “Lau i ‘Ula, ae pou i le Toa, ‘aso i le ‘u’unu, ‘afa i le a’a o le aoa, ae paepae i le Lei fanau -a Faasavalu o loo i Falelatai.” Ua uma ona fai tuuga-tala a Meto ma Alo-ona alu loa lea o Alo ma ta’u i lona Tina le mana’o o Meto. Ona fai atu lea o Sinalefatumoa ia Alo-“ua lelei”-ae tasi lona, e tatau ona e alu e te moe i le mea tonu e faatu ai le fale o Meto.
Ua alu ese Alo-ona valaau lea e le Tamaitai- o imoa uma lava ma fai tonu uma mo le faamoemoe, ona fai lea o Sinalefatumoa ia Alo-ia alu i le Ana o Meto ma moe i le mea tonu lava e manao Meto e faatu ai le fale-ma ia ‘aua lava nei gaoioi pe tilotilo i le faiga o le fale.
Ua toe fo’i Alo ia Meto-ma ina ua po-sa alu loa moe i le mea tonu lava e faatu ai le fale. A’o moe Alo-sa aga’i ane loa imoa poo isumu ua fau le fale ma sa fai lea galuega i le po atoa. Ina ua tafa ata a’o fai pea lea galuega-ua le mafai ona taofi le fia vaai o Alo i le fale lea ua alu le po atoa o fai.
O lea sa galo ai ia te ia- le upu a lona tina- ina ia ‘aua lava ne’i gaoioi. Sa nofo loa i luga Alo e vaai, ae talofa e, sa faafuase’i ona laga isumu poo imoa- ae tu’u ai le galuega lea e o’o mai lava i le asŏ-o loo i ai pea e le’i uma.
O le Fale la lenei e ta’ua so’o i le Upega o lauga a Faleupolu-“O le Fale Nai Amoa” e lau i ‘ula ae pou i le Toa….!
O le tama’ita’i foi lenei o Meto-e masani ona ta’ua e isi-“O le Tama’ita’i Amoa o Meto Tagivale.”
Na si'i mai i le tusi o le “Suaga a le Vaatele” tusia e: Fuimaono Fereti Tupua